Premer-mınıstr: Eldiń gaz qoryn ıgerýde uzaq merzimdi strategııa kerek

ASTANA. KAZINFORM – Qazaqstan óziniń gaz qoryn tıimdi ıgerý úshin tıisti mınıstrlikter júıeli jumys istep, uzaq merzimdi strategııa qura bilý kerek. Premer-mınıstr Oljas Bektenov Úkimet otyrysynda osyndaı tapsyrma berdi.

- Bizdiń elimizdiń «kógildir otyn» boıynsha áleýeti zor. Tabıǵı gaz qorynyń rastalǵan kólemi shamamen 4 trıllıon tekshe metr. Alaıda, ony ıgerý úshin júıeli tásilder men jańa ınvestıtsııalar, zamanaýı ınfraqurylym jáne uzaqmerzimdi strategııa qajet, - dedi ol.

Úkimet basshysynyń sózinshe, bul iste geologııalyq aqparatty tsıfrlandyrýdyń mańyzy zor.

- Búgingi tańda elimiz boıynsha gazdandyrý deńgeıi shamamen 62,4%-dy quraıdy. Gazdandyrýdyń bas shemasyna sáıkes 2030-shy jylǵa qaraı bul kórsetkishti 65%-ǵa deıin jetkizý josparlanyp otyr.

Ol úshin «Beıneý – Bozoı – Shymkent» magıstraldyq gaz qubyrynyń ekinshi jelisi jáne «Taldyqorǵan-Úsharal» gaz qubyry sııaqty iri jobalar iske asyrylyp jatyr. Olardy únemi baqylaýda ustaý qajet, - dedi Oljas Bektenov.

Eske salsaq, Prezıdent Qasym-Jomart Toqaev Jańaózen gaz óńdeý zaýyty qurylysynyń keshigýin Úkimettiń óreskel olqylyǵy retinde baǵalaǵan edi.