Premer-mınıstr eksporttyq áleýeti joǵary jańa jobalardyń tizbesin usynýdy tapsyrdy

ASTANA. KAZINFORM — Bıyl óńdeý ónerkásibindegi óndiris kólemi 4,4%-ǵa artty. Bul týraly Úkimet otyrysynda Premer-mınıstr Oljas Bektenov aıtty.

- Memleket basshysy Úkimettiń keńeıtilgen otyrysynda zamanaýı ónerkásiptiń negizin qalyptastyrý jáne óńdeý ónerkásibin damytý qajettigin atap kórsetti. Jalpy ishki ónim qurylymynda óńdeý ónerkásibiniń úlesi ken óndirýshi sektordan asyp tústi. Osy qarqyndy saqtap qana qoımaı, odan ári eseleı túsý kerek. Jańa klasterlerdi qurý ónimdi joǵary deńgeıde óńdeý júıesine kóshýge múmkindik beredi. Bıyl óńdeý ónerkásibindegi óndiris kólemi 4,4%-ǵa artty. Bul – ótken jyldyń sáıkes kezeńimen salystyrǵanda birshama joǵary kórsetkish, - dedi O. Bektenov.

Onyń aıtýynsha, ekonomıkany ártaraptandyrý jáne ósim josparlaryn oryndaý úshin óndiristik qýattardy arttyryp, shıkizattyq emes sektorda tereń óńdeýdi damytatyn naqty is-sharalar qajet. Eń perspektıvti baǵyttardy aıqyndap, mol ónim beretin ári eksportqa baǵdarlanǵan ınvestıtsııalyq jobalardy júzege asyrý qajet.

- Atalǵan sharalar syrtqy faktorlardyń áserine qaramastan ekonomıkanyń turaqtylyǵyn kúsheıtip, eksporttyq áleýetti arttyrady. Sondaı-aq jańa jumys oryndaryn qurýǵa jáne uzaq merzimdi ulttyq múddelerge saı keletin zamanaýı ındýstrııalyq bazany qalyptastyrýǵa múmkindik beredi. Sondyqtan naqty óndiristi qoldaý, ınvestorlardy tartý, ozyq tsıfrlyq tehnologııalardy iske qosý baǵytynda barlyq qajetti sharalar qabyldanýǵa tıis, - dedi Úkimet basshysy.

Bul turǵyda Premer-mınıstr óńdeý ónerkásibiniń qurylymyn ózgertý qajet ekenin aıtty.

- Keıbir baǵyttar boıynsha áli de bolsa tómen deńgeıde óńdelgen ónimderdiń úlesi basym, ıaǵnı bul qosylǵan qunnyń negizgi bóligi ekonomıkamyzdyń aıasynan tys qalyptasyp jatqanyn bildiredi. Bizdiń maqsatymyz – joǵary deńgeıde óńdelgen ári tehnologııalyq jaǵynan ozyq ónimder shyǵarý isin jolǵa qoıý. Bul oraıda jınaqtaýshy bólshekter shyǵarý, lokalızatsııa deńgeıin arttyrý, zamanaýı tehnologııalardy qoldaný, óndiristi avtomattandyrý men eńbek ónimdiligin arttyrý máselesine basa nazar aýdarý kerek. Ónerkásip, Energetıka, Aýyl sharýashylyǵy, Ulttyq ekonomıka mınıstrlikteri men «Báıterek» holdıngine bir aı merzimde qaıta óńdeý salasynda qosylǵan quny jáne eksporttyq áleýeti joǵary ónimder shyǵaratyn jańa ónerkásiptik jobalardyń naqty tizbesin usynýdy tapsyramyn. Іske qosylatyn ár joba óz aldyna bólek emes, ekonomıkaǵa mýltıplıkatıvti áseri turǵysynan keshendi túrde qarastyrylýǵa tıis. Salalyq memlekettik organdar men ákimdikter perspektıvti ınvestıtsııalyq jobalardy qajetti ınfraqurylymmen, resýrstarmen, memlekettik qoldaý sharalarymen qamtamasyz etsin, - dedi Oljas Bektenov.

Budan buryn habarlanǵandaı, Ónerkásip mınıstri Qarmet-tegi ózgeristerge túsinik berdi.