Premer-mınıstr: bızneske beriletin uzaq merzimdi kredıtter jetispeıdi

ASTANA. KAZINFORM – Úkimet basshysy Oljas Bektenov ekonomıkanyń naqty sektoryn qarjylandyrý salasyndaǵy birqatar problemany kóterdi.

— Bızneske beriletin uzaq merzimdi kredıtter boıynsha jetispeýshilik bar. Bankter qysqa merzimdi ári táýekeli az kredıt bergendi durys kóredi. Al ekonomıkanyń naqty sektoryna qoljetimdi jáne uzaq merzimdi qarjy resýrstary qajet. Kelesi másele, memlekettik qarjy ınstıtýttary men ekinshi deńgeıli bankter arasyndaǵy básekelestik. Memlekettik damý ınstıtýttary jobalarǵa negizinen ózderi qarjy bólip keledi, bul bankterdiń naqty sektorǵa degen qyzyǵýshylyǵyn tómendetedi, — dedi Oljas Bektenov Úkimet otyrysynda.

Premer-mınıstrdiń málimdeýinshe, ekonomıkanyń naqty sektoryn qarjylandyrýda basty róldi ekinshi deńgeıli bankter atqarýy tıis. 

— Memleket basshysy Úkimettiń keńeıtilgen otyrysynda dál osy máseleni basa aıtqan bolatyn. Úkimet bıyl ekonomıkanyń naqty sektoryndaǵy jobalardy ýaqtyly qarjylandyrýdy qamtamasyz etý úshin barlyq qajetti sharany qabyldaıdy. Memlekettik kepildikti qoldaný aıasyn keńeıtý, shaǵyn jáne orta bızneske arnalǵan kepildik berý qoryn qurý, sondaı-aq «Báıterek» holdınginiń kapıtalyn arttyrý josparlanyp otyr. Jalpy, Prezıdent qoıǵan mindetterdi sheshý úshin memlekettik organdar men bank sektory úılesimdi ári nátıjeli jumys isteýi kerek, — deıdi ol.

Buǵan deıin Oljas Bektenov ınvestıtsııalyq jobalardy pysyqtaýda memlekettik organdardyń sylbyr ekenin aıtqan edi.