Premer-mınıstr bıtým óndirisiniń halyqaralyq standartqa saı bolýyn tapsyrdy
AQTAÝ. KAZINFORM – Oljas Bektenov Mańǵystaý oblysyndaǵy energetıkalyq jáne ónerkásiptik ınfraqurylymdy jańǵyrtý jobalarymen tanysty. Bul týraly Úkimettiń baspasóz qyzmeti habarlady.
Qazaqstan Respýblıkasynyń Premer-mınıstri Oljas Bektenov Mańǵystaý oblysyna jumys sapary aıasynda Memleket basshysynyń óńirdi keshendi damytýǵa, onyń energetıkalyq qaýipsizdigin nyǵaıtýǵa, kommýnaldyq ınfraqurylymdy jańǵyrtyp, ónerkásiptik áleýetti keńeıtýge baǵyttalǵan tapsyrmalarynyń oryndalý barysyn tekserdi.
Atap aıtqanda, Premer-mınıstr jol bıtýmyn óndirý kólemin arttyrý, jańa óndirý qýatyn iske qosý, «MAEK» JShS energetıkalyq ınfraqurylymyn jańartý jáne Aqtaý qalasyndaǵy jylýmen jabdyqtaý tapshylyǵyn joıý jónindegi jobalardy júzege asyrýmen tanysty.
Oljas Bektenov «CASPI BITUM» BK» JShS zaýytynda jol bıtýmyn óndirýge mamandandyrylǵan iri kásiporynnyń óndiristik qýatyn tekserdi. «QazMunaıGaz» UK» AQ basqarma tóraǵasy Ashat Hasenov 2025 jyly elektrmen tuzsyzdandyrý jáne atmosferalyq-vakýýmdyq aıdaý (ET-AVA) qondyrǵysyn jańǵyrtý jumystarynyń aıaqtalǵanyn baıandady, sonyń nátıjesinde munaı óńdeý jáne bıtým óndirý boıynsha jobalyq qýaty bir jarym esege artty.
Ótken jyly kásiporynda 696 myń tonna munaı óńdelip, 284 myń tonna bıtým óndirilse, 2026 jyldyń qańtar-maýsym aılarynda tıisinshe 277 myń tonna munaı jáne 106 myń tonna bıtým óndirildi. Sondaı-aq kásiporynda aýa sapasyn táýlik boıy baqylaý, tazartylǵan sýdy qaıta paıdalaný jáne energııa tıimdiligin arttyratyn sheshimder engizýdi qamtıtyn ekologııalyq jańǵyrtý kesheni júzege asyrylyp jatyr.
Premer-mınıstr óndiriletin bıtýmnyń halyqaralyq standarttarǵa sáıkestigin qamtamasyz etýdi tapsyrdy.
«Aqtaý energetıkalyq kompanııasy» JShS alańynda Premer-mınıstrge qýaty 160 MVt bolatyn bý-gaz qondyrǵysy qurylysynyń barysy týraly baıandaldy. «AEK» JShS bas dırektory Ge Lıchýn jobanyń Mańǵystaý oblysy men elimizdiń batys óńirin energııamen jabdyqtaý senimdiligin arttyrý jáne ónergııa óndirý qýatyn arttyrý maqsatynda júzege asyrylyp jatqanyn atap ótti. Investıtsııa kólemi $210 mln-dy quraıdy, 300-ge jýyq jumys orny ashylady. Qazirgi ýaqytta qurylys-montajdaý jumystary shamamen 30% oryndaldy, 2027 jyldyń maýsymynda paıdalanýǵa berý josparlanýda.
Mańǵystaý oblysy ákiminiń orynbasary Erbol Іzbergenov «Mańǵystaý atom energetıkalyq kombınaty» (MAEK) JShS bazasynda jalpy elektr qýaty 500 MVt-qa deıin jáne jylý qýaty saǵatyna 560 Gkal bolatyn jańa bý-gaz qondyrǵylaryn salý jospary týraly baıandady. «MAEK» JShS Mańǵystaý oblysynyń óńirdi elektrmen, jylýmen jáne sýmen jabdyqtaýdy qamtamasyz etetin energetıkalyq ınfraqurylymynyń negizgi nysany bolyp sanalatyny atap ótildi. Jańa keshen eskirgen energııa bloktaryn aýystyryp, elektr jáne jylý energııasynyń aralas óndirisin qamtamasyz etýi kerek. Joba sondaı-aq óńirdiń sýmen jabdyqtaý júıesin odan ári damytý úshin tuşylandyrý qýattaryn ıntegratsııalaýdy kózdeıdi.
Premer-mınıstrge Aqtaý qalasyn jylýmen qamtamasyz etýge arnalǵan ortalyq qazandyq salý jobasy usynyldy. Qazirgi ýaqytta qalany jylýmen qamtýdaǵy negizgi júkteme «MAEK» JShS-niń jylý kózderine túsip otyr. Qoldanystaǵy belgilengen qýat saǵatyna 500 Gkal bolǵanymen, qazirgi tańda Aqtaý qalasynyń jylýǵa degen qajettiligi saǵatyna 745 Gkal-dy quraıdy. Saǵatyna 363 Gkal qýatqa ıe ortalyq qazandyqtyń qurylysy turǵyn úı jáne áleýmettik ınfraqurylymnyń 2 mln sharshy metrden astam aýmaǵyn jylýmen qamtamasyz etýge, jańa jáne qoldanystaǵy shaǵynaýdandardyń bir bóligin ortalyqtandyrylǵan jylýmen jabdyqtaý júıesine qosýǵa, sondaı-aq qalanyń jylýmen jabdyqtaý júıesin ózara táýelsiz eki tizbekke bólýge múmkindik beredi.
Jumys saparynyń qorytyndysy boıynsha Premer-mınıstr jobalardy ýaqtyly júzege asyrý boıynsha birqatar tapsyrmalar berdi.
- Memleket basshysy azamattardyń ómir súrý sapasyn jaqsartýdyń basty mindetin atap ótti. Sapaly jáne úzdiksiz jylýmen jabdyqtaý máseleleri ákimdik pen tıisti memlekettik organdar jumysynyń basym baǵyttarynyń qataryna kiredi. Sondyqtan energetıka, kólik, ónerkásiptik ınfraqurylymnyń barlyq jobalaryn erekshe baqylaýda ustaýdy jáne ýaqtyly paıdalanýǵa berýdi qamtamasyz etýdi tapsyramyn, — dep atap ótti Oljas Bektenov.
Aıta ketelik Bektenov Kaspıı jaǵasynda salynatyn keme jasaý zaýytynyń jobasyn qarady.
