Premer-Mınıstr: Barlyq memlekettik jáne qoǵamdyq ınstıtýttardy túbegeıli jańǵyrtý bastaldy
ASTANA. KAZINFORM — QR Premer-Mınıstri Oljas Bektenov jańa Konstıtýtsııanyń kúshine enýine baılanysty málimdeme jasady. Búgin mınıstrler kabıneti jańa Konstıtýtsııanyń kúshine enýi aıasynda Memleket basshysynyń tapsyrmalaryn oryndaý barysyn qaraıdy.
Úkimet basshysy jańa Ata zań — elimizdiń aldaǵy ondaǵan jyldaǵy damý baǵdaryn aıqyndaıtyn negizgi qujat ekenin atap ótti.
— Ata zańnyń qabyldanýy Qasym-Jomart Kemeluly Toqaevtyń basshylyǵymen júzege asyrylyp jatqan elimizdi jańǵyrtýdyń jańa kezeńin azamattarymyzdyń jappaı qoldaıtynyn anyq kórsetti. Jańa Konstıtýtsııa ekonomıkalyq kórsetkishtermen ǵana ólshenbeıtin, ozyq ári qarqyndy damýdyń berik ınstıtýtsıonaldyq negizin qalyptastyrady, — dedi O. Bektenov Úkimettiń búgingi otyrysynda.
Premer-Mınıstrdiń aıtýynsha, Memleket basshysy Qazaqstan jahandyq ózgeristerdiń kóshin qýyp jetýmen ǵana shektelmeı, jańa ekonomıkalyq ahýaldy qalyptastyratyn belsendi qatysýshyǵa aınalýy tıis ekenin aıtty. Júrgizilip jatqan reformalardyń barlyǵy dál osy mindetterdi júzege asyrýǵa baǵyttalǵan. Al olardyń túp negizinde jańa Konstıtýtsııamyz tur.
— Barlyq memlekettik jáne qoǵamdyq ınstıtýttardy túbegeıli jańǵyrtý bastaldy. Júzege asyrylyp jatqan ózgeristerdiń barlyǵy qoǵamdaǵy turaqtylyqty odan ári saqtaý, azamattardyń ál-aýqatyn laıyqty deńgeıde qamtamasyz etý, zań men tártip qaǵıdatyn nyǵaıtý sondaı-aq qazaqstandyqtardyń ozyq oıly ári joǵary ıntellektýaldy býynyn qalyptastyrý úshin negiz bolyp tabylady. Osy turǵyda jańa Konstıtýtsııamyzdyń sapaly iske asyrylýyn qamtamasyz etý úshin qabyldanyp jatqan sharalardy qaraımyz, — dedi Úkimet basshysy.
Aıta keteıik, búgin jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek.
Prezıdent qazaqstandyqtardy Jańa Konstıtýtsııanyń kúshine enýimen quttyqtady.
