Premer-mınıstr atom energetıkasy salasyndaǵy jobalardy baqylaýda ustaýdy tapsyrdy

ASTANA. KAZINFORM – Energetıka mınıstrligi atom energetıkasy salasyndaǵy jobalar boıynsha jumystardy baqylaýda ustaýy qajet. Bul týraly búgin Úkimet otyrysynda Premer-mınıstr Oljas Bektenov aıtty.

- Sırek jer metaldary boıynsha Jer qoınaýy jáne jer qoınaýyn paıdalaný týraly kodekske ózgerister engizildi, sondaı-aq jer qoınaýyn geologııalyq zertteýge qomaqty qarajat bólinýde. Osyǵan baılanysty Ónerkásip mınıstrligi kvazımemlekettik sektormen birlesip, belgilengen josparlardy, onyń ishinde sheteldik seriktestermen qol jetkizilgen kelisimderdi tez arada iske asyrý jumystaryn bastaýǵa tıis. Sondaı-aq Energetıka mınıstrligi salalyq agenttikpen birlesip, atom energetıkasy salasyndaǵy jobalar boıynsha jumystardy baqylaýda ustasyn, - dedi Úkimet basshysy.

Aıta keteıik, keshe «Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy. 

Suhbat barysynda Prezıdent týrızm salasyndaǵy kadr tapshylyǵy óte ózekti másele ekenin aıtty.