Premer-Mınıstr Astanadaǵy órt sóndirý tehnıkasyn jasaıtyn zaýytqa bardy
ASTANA. KAZINFORM – Premer-Mınıstr Oljas Bektenov Astana qalasy boıynsha jumys saparynda Prezıdenttiń ekonomıkany ártaraptandyrý jáne tehnologııalyq ınfraqurylymdy damytý tapsyrmalaryna sáıkes, elordanyń negizgi ındýstrııalyq jobalaryn júzege asyrý barysyn tekserdi. 2025 jyldyń qorytyndysy boıynsha, ónerkásip óndirisiniń kólemi 3,4 trln teńgeden asqan.
Ásirese, óndiristik áleýetti nyǵaıtýǵa, zamanaýı tehnologııalyq sheshimderdi engizýge basa nazar aýdarylǵan. Premer-mınıstrge óndiristik tsıkldiń negizgi aımaqtary tanystyryldy. Qazirgi ýaqytta shyǵarylatyn ónim túrlerin keńeıtýge jáne jersindirý deńgeıin arttyrýǵa baǵyttalǵan óndiristik jelilerdi damytý jumystary júrýde.
Elordada ónerkásip kásiporyndarynyń negizgi bóligi №1 Indýstrııalyq park aýmaǵynda shoǵyrlanǵan. Óndiristik portfel jalpy quny 333,3 mlrd teńge bolatyn 137 jobany qamtıdy, onda 9,5 myńnan astam jumys orny qarastyrylǵan.
Premer-mınıstr «Avtokomponenty KZ» JShS órt sóndirý jáne arnaıy tehnıka men aspaly jabdyqtar óndiretin zaýytynyń qyzmetimen tanysty. Kásiporyn 2025 jyldyń qańtar aıynda iske qosylǵan. Joba kásipkerlikti damytý qorynyń qoldaýyna ıe bolǵan jáne 5,1 mlrd teńgeden astam jeke qarajat bólingen.
Óndiris dırektory Aleksandr Plýjnıkov zaýyttyń jobalyq qýaty jylyna 400 tehnıkaǵa deıin jetetinin habarlady. Onyń ishinde órt sóndirý avtotsısternalary, vahtalyq fýrgondar jáne kommýnaldyq-jol mashınalary bar. Ónimder Tótenshe jaǵdaılar mınıstrliginiń, kommýnaldyq qyzmetterdiń jáne ózge de qurylymdardyń qajettilikteri úshin jetkiziledi. 2026-2028 jyldary qyzmetkerler sanyn kezeń-kezeńimen 200 adamǵa deıin arttyrý josparlanǵan.
Oljas Bektenov otandyq mashına jasaý salasyn ındýstrııalandyrýdyń jáne eńbek ónimdiligi joǵary jumys oryndaryn qurýdyń negizgi draıverleriniń biri retinde damytýdyń mańyzdylyǵyn atap ótti.
– Óńdeý ónerkásibiniń ósýi ekonomıkany ártaraptandyrýǵa jáne otandyq óndiristiń básekege qabilettiligin arttyrýǵa tikeleı áser etedi. Prezıdent Qasym-Jomart Toqaev Úkimettiń keńeıtilgen otyrysynda atap ótkendeı, biz el ishinde kóbirek ónim óndirýimiz kerek, naqty sektordy nyǵaıtyp, turaqty jumys oryndaryn qurý qajet. Úkimet óz tarapynan óndiris pen lokalızatsııalaýdy qamtamasyz etetin kásiporyndarǵa ınfraqurylym, kadrlardy daıarlaý jáne naqty tapsyrys tetikteri arqyly qoldaý kórsetedi. Nátıje neǵurlym kóbirek ónim shyǵarýǵa, kóbirek jumys ornyn qurýǵa jáne joǵary sapaǵa negizdelýi kerek, — dep atap ótti Oljas Bektenov.
Sapar qorytyndysy boıynsha, Premer-mınıstr ónerkásiptik bazany damytýǵa jáne tsıfrlyq ınfraqurylymdy nyǵaıtýǵa baǵyttalǵan jobalardy júzege asyrýdy jalǵastyrýdy tapsyrdy.
Buǵan deıin Premer-mınıstr tabıǵı gazben jumys isteıtin JEO-3-tiń negizgi jabdyqtaryn qarap shyqqan edi.