Premer-mınıstr asyl tuqymdy mal basyn satyp alý jumysyn jedeldetýdi tapsyrdy
ASTANA.KAZINFORM – QR Premer-mınıstri Oljas Bektenov Úkimet otyrysynda Aýyl sharýashylyǵy mınıstrligine salany damytý boıynsha birqatar mindet júktedi.
Onyń sózinshe, aýyl sharýashylyǵynda vegetatsııalyq kezeńniń turaqtylyǵyn qamtamasyz etip, egin jınaý naýqanyn sapaly ótkizý jáne ınvestıtsııalyq jobalardy ýaqytyly iske asyrý – negizgi mindetter.
– Ótkizý naryqtaryn keńeıtý jáne otandyq ónimniń básekege qabilettiligin arttyrý maqsatynda Aýyl sharýashylyǵy mınıstrligine Básekelestikti qorǵaý jáne damytý agenttigimen birlesip, Azyq-túlik korporatsııasyna astyq óńdeý ónimderin tasymaldaý kezinde shyǵyndardy óteý jónindegi operatordyń ókilettikterin berýdi tapsyramyn. Otandyq kásiporyndardy qoldaý maqsatynda Aýyl sharýashylyǵy mınıstrligi «Atameken» Ulttyq palatasymen birlesip, maqta óńdeý kásiporyndaryn jańǵyrtýǵa jáne qant qyzylshasyn tasymaldaýǵa ınvestıtsııalyq sýbsıdııalaý tetigin engizsin. Óńir ákimdikteri Aýyl sharýashylyǵy mınıstrligimen birlesip, naryqty et ónimderimen tolyqtyrý jáne onyń eksportyn ulǵaıtý úshin Mal sharýashylyǵyn damytý baǵdarlamasy aıasynda asyl tuqymdy mal basyn satyp alý jumysyn jedeldetýge tıis, – dedi Úkimet basshysy.
Aıta keteıik, buǵan deıin asyl tuqymdy mal sharýashylyǵy salasyndaǵy qujat nysandary qaıta qaralatynyn jazǵanbyz.
