Premer-Mınıstr Almatydaǵy JEO qurylysyn tekserýge orynbasaryn jiberdi
ASTANA. KAZINFORM – Premer-Mınıstr Oljas Bektenov Almaty qalasyndaǵy ekinshi jáne úshinshi JEO qurylysynyń qarqyny tómendep ketkenin synǵa aldy. Búgingi Úkimet otyrysynda «Samuryq-Energo» AQ basshylyǵyna tıisti suraq qoıdy.
Óz kezeginde «Samuryq-Energo» AQ basqarma tóraǵasy Qaırat Maqsutov Almatydaǵy ekinshi jáne úshinshi JEO qurylystary jeke baqylaýynda ekenin aıtty.
— Merdigerge jumystardy kúsheıtý, úsh aýysymdyq merzimge kóshirý tapsyrmalary berildi. Osy aıdyń aıaǵy men mamyr aıynyń basynda, qysqa merzimde merdiger jumys alańyna myń jarym adam shyǵarýy kerek. Negizgi jabdyqtar qurylys alańyna jetkizildi. Qosalqy jabdyqtar eki aı ishinde keledi. Jalpy nysandy ýaqytynda berýge bar kúshimizdi salamyz jáne qamtamasyz etemiz, — dep jaýap berdi Q. Maqsutov.
— Roman Vasılevıch (Sklıar — Premer-mınıstrdiń birinshi orynbasary), ózińiz baryp tekserińiz, sosyn nátıjesin maǵan baıandańyz. Obektıvti aqparat kerek, — dedi O. Bektenov.
Buǵan deıin Qaırat Maqsutov Ekibastuz GRES úshinshi energoblogy 2028 jyly iske qosylatynyn aıtqan edi. Jańa energobloktardyń iske qosylýy qýat tapshylyǵyn jaýyp qana qoımaı, derekterdi óńdeý ortalyǵyn, protsessordy salqyndatý júıelerin damytýǵa múmkindik beredi.
Sondaı-aq Kókshetaý, Semeı, Óskemen JEO-lary elimizdegi ekologııalyq zańnama talaptaryna sáıkes jumys istep, jasandy ıntellekt pen «taza kómir» tehnologııasyn qoldanbaq.
