Almaty oblysynyń ákimi qyzmetine Shyńǵys Árinovpen birge taǵy kim usynyldy

Memleket basshysynyń arnaıy tapsyrmasymen Premer-mınıstr Oljas Bektenov jáne Prezıdent Ákimshiliginiń basshysy Roman Sklıar Almaty oblysy máslıhattary depýtattarynyń otyrysyna qatysty.

Roman Sklıar depýtattarǵa Prezıdent Qasym-Jomart Toqaevtyń Almaty oblysynyń ákimi laýazymyna eki kandıdatty: burynǵy tótenshe jaǵdaılar mınıstri Shyńǵys Árinov pen Almaty oblysy ákiminiń orynbasary Ǵanı Maılybaevty usyný týraly hatyn oqydy. 

Jıynǵa 178 depýtat qatysty. Ashyq daýys berý qorytyndysy boıynsha Shyńǵys Árinovtiń kandıdatýrasyn depýtattardyń 83%-y qoldady.

Qazaqstan Respýblıkasy Prezıdentiniń tıisti Jarlyǵymen Shyńǵys Árinov Almaty oblysynyń ákimi bolyp taǵaıyndaldy.

Óńir aktıvimen ótken jıynda Premer-mınıstr Oljas Bektenov Marat Sultanǵazıevke oblystyń áleýmettik-ekonomıkalyq damýyna qosqan úlesi úshin alǵys bildirdi. 

Úkimet jetekshisi Almaty oblysynyń aktıvine óńirdiń jańa ákimi Shyńǵys Árinovti tanystyrdy. 

Jıynda jańa Konstıtýtsııanyń kúshine enýi elimizdi odan ári jańǵyrtýdaǵy mańyzdy jańa tarıhı kezeńniń bastaýy bolǵany atap ótildi.

Úkimet aldynda Memleket basshysy aıqyndaǵan maqsat ekonomıkanyń sapaly ári ornyqty ósýin qamtamasyz etýge qol jetkizý mindeti tur. 

Oljas Bektenov Quryltaıdyń birinshi sessııasynda azamattarymyz ben el ekonomıkasy úshin mańyzdy nysandardyń qurylysyn ozyq qarqynmen júrgizý týraly Prezıdent tapsyrmalaryn oryndaýǵa basa nazar aýdardy. Atap aıtqanda, olar – halyqtyń ómir súrý sapasyn odan ári arttyrýǵa asa qajetti áleýmettik, ınjenerlik, energetıkalyq jáne sý ınfraqurylymy. Búgingi tańda Almaty oblysynyń ákimdigine densaýlyq saqtaý salasynyń birqatar jańa jobalaryna qosymsha qarajat bólindi. Olardyń ishinde Qarasaı aýdanynda perınataldyq ortalyq pen emhana salý, Qaskeleń qalasynda juqpaly aýrýlar aýrýhanasyn, Іle aýdanynda perzenthana bólimshesin jańǵyrtý jumystary bar. Nysandardy ýaqtyly paıdalanýǵa berý qajet. Premer-mınıstr bólingen qarajattyń maqsatty ári tıimdi jumsalýyn qatań baqylaýdy tapsyrdy. Árbir teńge óńir turǵyndary úshin naqty nátıje ákelýi tıis. Qadaǵalaýdy kúsheıtý úshin «tsıfrlyq teńge» tetigi qoldanylatyn bolady.

Sonymen qatar aýqymdy qurylys baǵdarlamalaryn júzege asyrý kezinde otandyq taýar óndirýshilerge basymdyq berilýi tıis. Bul jergilikti qurylys uıymdaryn jumysqa tartýǵa, sondaı-aq qazaqstandyq qurylys materıaldary men jabdyqtaryn qoldanýǵa qatysty. Osy rette Oljas Bektenov satyp alynatyn qyzmetter men taýarlarǵa baǵanyń alypsatarlyqpen ósýine jol bermeýdi tapsyrdy. Kásipkerler úshin bul – óndiris kólemin ulǵaıtýǵa berilgen óte jaqsy múmkindik, sol sebepti otandyq óndirýshiler baǵany jasandy jolmen kóterýge emes, jumys kólemin ulǵaıtýǵa basa mán berýi qajet. Atalǵan qadamdar kepildendirilgen paıda tabýǵa, jańa jumys oryndarynashýǵa, jalaqyny kóterýge múmkindik beredii. Mundaı tásil ishki óndiris pen azamattardy jumyspen qamtýdyń barlyq tizbegin yntalandyrýdy qamtamasyz etedi.

Premer-mınıstr Almaty oblysy ákimdiginiń jumysynyń negizgi basymdyqtaryn atap ótti. Aýyldyq jerlerde áleýmettik qyzmetterdiń qoljetimdiligin arttyrý jáne qala men aýyl arasyndaǵy ınfraqurylymdyq alshaqtyqty qysqartý boıynsha mindetter aıqyndaldy. Eldi mekenderdi sapaly kommýnaldyq qyzmettermen qamtýdy arttyryp, ınfraqurylymnyń avarııalyq jaǵdapılaryn azaıtý qajet. Sý, jylý, elektrmen jabdyqtaý jáne sý burý júıelerin kezeń-kezeńimen jańǵyrtýǵa, sondaı-aq jańa elektr qýatyn óndirý kózderin salýǵa basa nazar aýdaryldy.

AÓK salasynda sýarmaly eginshilikti damytý, sý shyǵynyn azaıtý, aýyl sharýashylyǵynda sý únemdeý tehnologııalaryn keńinen engizý jáne óńir ekonomıkasyndaǵy agroónerkásip kesheniniń úlesin ulǵaıtý qajettigi atap ótildi. Kólik qozǵalysynyń qaýipsizdigin qamtamasyz etý úshin óńirdiń avtomobıl joldaryn jóndeý men rekonstrýktsııalaýdy jandandyrý tapsyryldy. Óńirge ınvestıtsııa tartýdy kúsheıtý, óńdeý ónerkásibin, agroónerkásiptik keshendi, týrızmdi jáne shaǵyn jáne orta bıznesti damytyp, jańa ekonomıkalyq ósý núktelerin qalyptastyrý, sonymen qatar Alataý qalasynyń áleýetin tıimdi paıdalanýdyń mańyzdylyǵy atap ótildi.

Oljas Bektenov Memleket basshysy qoıǵan mindetter barlyq baǵyt pen salalar boıynsha júıeli ári keshendi túrde júzege asyrylýy tıis ekenin atap ótti. Óńirdiń odan ári áleýmettik-ekonomıkalyq damýyn qamtamasyz etý úshin jan-jaqty sharalar qabyldaý qajet.