Premer-mınıstr Almaty oblysy ákimdigine Alataý qalasyna qatysty birqatar tapsyrma berdi
ASTANA. KAZINFORM – Premer-mınıstr Oljas Bektenov memleketik organdar basshylarynyń, sarapshylar men ýrbanısterdiń qatysýymen Alataý qalasyn damytý jónindegi keńestiń otyrysyn ótkizdi. Onda Memleket basshysynyń halyqaralyq iskerlik belsendilik, ınnovatsııalar jáne tehnologııalar ortalyǵyn qurý boıynsha alǵa qoıǵan mindetterin júzege asyrýǵa basa nazar aýdaryldy. Bul týraly Úkimettiń baspasóz qyzmeti habarlady.
Keńes músheleri Prezıdenttiń Alataý qalasyna damý qarqyny ozyq qala degen arnaýly mártebe berý jónindegi Jarlyǵy sheńberinde tıisti ınstıtýtsıonaldyq bazany ázirleý barysy men ınfraqurylym salý jáne ınvestıtsııalar tartý jónindegi sharalardy talqylady. Alatau Sity Authority jańa memlekettik qorynyń qyzmetindegi máseleler qaraldy.
Premer-mınıstrge ázirlenip jatqan «Alataý qalasynyń arnaıy mártebesi týraly» Konstıtýtsııalyq zań jobasyna qatysty usynystar aıtyldy, olardyń ishinde óziniń jeke retteýshilik jáne ákimshilik ekojúıesin qurý, quqyqtyq jáne basqarýshylyq ınnovatsııalar, memlekettik servısterdiń tsıfrlyq ıntegratsııasy jáne taǵy da basqalar bar.
Odan bólek, qurylys, energetıka, ekologııa, kólik jáne TKSh salalarynda, sonyń ishinde «aqyldy» qala tehnologııasy sheńberinde de, halyqaralyq standarttar men ınnovatsııalardy engizý usynylyp otyr. Kepildikterdi qamtamasyz etý jáne ınvestorlar úshin qolaıly jaǵdaılar jasaý jónindegi sharalar da kózdelgen. Mańyzdy baǵyttardyń biri – robototehnıkalyq júıelerdi damytý jáne keńinen paıdalaný, sondaı-aq tsıfrlyq aktıvterdiń aınalymyn retteý.
Keńes músheleri Alataý qalasynda ınjenerlik-ınfraqurylymdyq jobalardy júzege asyrý jónindegi Jol kartasyn qarady. Qanat Bozymbaev búgingi tańda ınjenerlik jelilerdi josparlaýdyń salalyq shemalary bekitilgenin jáne birinshi kezekte jobasy jasalyp, qurylysy salynatyn 30 nysan anyqtalǵanyn baıandady.
Munda qoldanystaǵy ǵımarattardy rekonstrýktsııalaý jáne jańa ınfraqurylym nysandaryn salý jumystary qatar júrgiziledi. Jańa nysandardyń ishinde birneshe qosalqy stansalar, sý jınaý toraby, gaz qubyrlary, káriz tazartý qurylystary, avtojoldar jáne taǵy da basqalar bar. Bul jumystardy kelesi jyly bastap ketý josparlanyp otyr. Infraqurylymdyq nysandardy salý kezinde «Energetıkalyq jáne kommýnaldyq sektorlardy jańǵyrtý» ulttyq jobasynyń tetikteri paıdalanylatyn bolady. Sondaı-aq EPC+F quraldaryn qoldaný múmkindikteri qarastyrylady, munda merdiger kompanııa qarjylandyrýdan bastap jobanyń barlyq kezeńderine jaýap beredi.
Almaty oblysynyń ákimi Marat Sultanǵazıev Alataý qalasynyń aǵymdaǵy áleýmettik-ekonomıkalyq damýy jáne jańa ınvestıtsııalyq jobalardy iske qosý boıynsha atqarylyp jatqan jumystar týraly baıandady.
Alataý qalasynyń bıýdjeti úsh esege ósip, 8,8 mlrd teńgege jetti. 10 aıda ónerkásiptik óndiris kólemi 17%-ǵa artyp, 115,6 mlrd teńge boldy. Bul rette ınvestıtsııa kólemi 13%-ǵa ósip, búginde shamamen 46,4 mlrd teńgege jetti. Pýl 21 myńnan astam jumys ornyn ashýdy kózdeıtin 41 ınvestıtsııalyq jobany qamtıdy. Qazirgi ýaqytta quny 1 trln teńge bolatyn 18 joba júzege asyrylýda. Bul – PepsiCo, United Hygiene, «Molochnaıa dolına», ASP arena, QazQon Hub, AVZ, Istkomtrans sııaqty basqa da iri kompanııalardyń logıstıka, AÓK, tamaq jáne jeńil ónerkásip salalaryndaǵy jańa óndiris oryndary.
Jalpy aýdany 97,9 myń gektardy quraıtyn elimizdegi eń iri Alatau AEA qurý jumystary júrgizilip jatyr. Onyń 24 myń gektardan astamy qala syrtynda ornalasqan jáne AÓK ónimderin qaıta óńdeýdegi mańyzdy jobalardy qamtıdy. Osy óndiris oryndaryna kepildikterdi saqtaý jáne jańa kásiporyndardy iske qosý maqsatynda jańa ónerkásiptik-logıstıkalyq AEA qurý jónindegi ákimdiktiń usynystary qaraldy. Bolashaqta bul Almaty oblysynda ındýstrııalyq, logıstıkalyq, týrıstik jáne energetıkalyq klasterlerdiń damýyna yqpal etedi.
Bas jospardy júzege asyrý aıasynda Alataýdyń sáýlet kelbeti men zamanaýı qala qurylysyna qatysty sheshimderge erekshe nazar aýdaryldy. «Caspian Group» AQ dırektorlar keńesiniń tóraǵasy ıÝrıı Tshaı Iconic building iskerlik ortalyǵynyń kórnekti ǵımaraty qurylysyn qamtıtyn, Gate District aýdanynda jańa iskerlik aýdandy damytý jónindegi jobany tanystyrdy. Bıylǵy qyrkúıek aıynda Memleketter basshylarynyń qatysýymen ótken Qazaq-qytaı iskerlik keńesi aıasynda atalǵan joba boıynsha úshjaqty kelisimge qol jetkizildi.
Jalpy, Alataýda turǵyn úı qurylysy qazirgi tańda oń qarqyn kórsetip otyr. Bıyl 103 myń sharshy metrden astam turǵyn úı paıdalanýǵa berildi. Halyqaralyq sarapshylardy tartý jáne álemniń jetekshi megapolısteri tájirıbesin zerdeleý arqyly qalanyń dızaın-kody jáne keshendi kólik shemasy ázirlenýde.
Otyrys qorytyndysy boıynsha Premer-mınıstr tıisti mınıstrlikter men Almaty oblysy ákimdigine jumystardy jedeldetý jáne sapaly júzege asyrý jóninde birqatar tapsyrma berdi.
Aıta keteıik, Alataý aýdany shahardyń basty ónerkásip ortalyqtarynyń biri retindegi ornyn nyǵaıtyp keledi. Aýdanda jańa kásiporyndar ashylyp jatyr.