Premer-mınıstr: Áleýmettik shyǵyndardyń tıimdiligine suraq kóp

ASTANA. KAZINFORM — Premer-mınıstr Oljas Bektenov Úkimettiń keńeıtilgen otyrysynda Ulttyq qor aqshasyn tek iri ınfraqurylymdyq jobalarǵa ǵana jumsalatynyn málim etti.

— Ulttyq qordyń qarajaty, siz tapsyrǵanyńyzdaı, tek iri ınfraqurylymdyq obektilerdi salý úshin ǵana suralatyn bolady. Sonymen qatar biz memlekettik shyǵystardyń tıimdiligin arttyryp, bıýdjet tártibin nyǵaıtamyz. Sýbsıdııalaý shyǵyndary barlyq salada toqtaýsyz ósip barady. Onyń ústine olardyń naqty áseri esepke alynbaıdy, ári memlekettik organdardyń tarapynan baqylaý da álsiz. Sýbsıdııa alý keıbir kompanııalardyń bıznes-modeliniń bir bóligine aınaldy, — dedi Premer-mınıstr.

Oljas Bektenov sońǵy 3 jylda 2,2 trln teńgelik 770 jobanyń smetalyq quny qymbattaǵanyn, mundaı tendentsııanyń kúmándi jaqtary da bar ekenin aıtty.

— Respýblıkalyq jáne jergilikti bıýdjet shyǵystarynyń jartysynan kóbi — 18 trln teńgeden astam soma áleýmettik salaǵa baǵyttalyp otyr. Al, bul shyǵyndardyń tıimdiligine qatysty úlken suraq bar. 9 ortalyq jáne barlyq jergilikti atqarýshy organdar áleýmettik shyǵystardyń ákimshileri bolyp tabylady. Bul osy shyǵystardyń bólshektenip jáne oǵan baqylaýdyń bosańsyp ketýine alyp keledi, — dedi Úkimet basshysy.

Premer-mınıstr tsıfrlyq quraldar arqyly áleýmettik maqsattarǵa jumsalatyn bıýdjet qarjysyn baqylaý kúsheıtilgenin atap ótti. Pılottyq rejımde Taraz, Shymkent, Túrkistan jáne Oral qalalarynda balabaqshalardy qarjylandyrýdyń ashyq tsıfrlyq tetigi engizilgen.

— Bul jalǵan málimetterdi alyp tastaý esebinen 4 qalanyń ózinde ǵana 20 mlrd teńgeden astam qarajat únemdeýge múmkindik beredi. Qazir bul tájirıbe elordada engizilýde, bıylǵy jyldyń sońyna deıin búkil el aýmaǵyna taratylatyn bolady, — dedi O.Bektenov.

Aıta keteıik, elordada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.