Premer-Mınıstr áleýmettik mańyzy bar taýarlar baǵasyn tejeýdi tapsyrdy

ASTANA. KAZINFORM – Áleýmettik mańyzy bar taýarlar baǵasynyń ósýin tejeý Úkimettiń basym mindeti bolyp qala beredi. Bul týraly Premer-mınıstr Oljas Bektenov aıtty.

«Sondyqtan óńirler osy jumysqa basa nazar aýdarýǵa tıis. Ol úshin qajetti quraldardyń bári bar. Nátıjesin kórip otyrmyz – bıyl qyrkúıek aıynda ınflıatsııa 8,3%-ǵa deıin baıaýlady. Inflıatsııa deńgeıin baqylaý men tómendetý jónindegi is-sharalar josparyn oryndaý boıynsha barlyq qajetti sharalardy qabyldaý qajet. Ákimdikter azyq-túlik taýarlary baǵasyn turaqtandyrý boıynsha belsendi jumysty jalǵastyrýǵa tıis», - dedi O. Bektenov búgingi Úkimet otyrysynda.

Úkimet basshysy otandyq taýar óndirýshilerdi qoldaý turaqty negizde júzege asyrylyp jatqanyn jetkizdi.

«Negizgi qorlardy jańartýǵa, nomenklatýrany ulǵaıtýǵa jáne ónimniń qosylǵan qunyn arttyrýǵa baǵyttalǵan kásipkerlik bastamalardy qoldaý sharalaryn kúsheıtý qajet. Birinshi kezekte ósý áleýeti joǵary shaǵyn jáne orta kásiporyndardy qoljetimdi qarajatpen qamtý máselesine kóńil bólý kerek. Óńirler Jergilikti qamtý jónindegi komıssııalardyń jumysyn kúsheıtýi qajet. Ónerkásip, Qarjy, Ulttyq ekonomıka mınıstrlikteri «Atameken» palatasymen birlesip, otandyq taýarlardy qoldanýdyń tıimdi monıtorıngin qamtamasyz etsin», - dedi Premer.

Sonymen birge, bıýdjettik baǵdarlama ákimshileri qarjylyq tártipti kúsheıtýleri kerek.

«ıAǵnı, qarajatty ýaqytyly ıgerýge basa nazar aýdarǵan jón. Bıýdjettik parametrlerdi qatań saqtaı otyryp, qarajatty tıimdi bólýdi qamtamasyz etý qajet. Qoryta aıtqanda, memlekettik jáne jergilikti atqarýshy organdar osy jyldyń sońyna deıin barlyq resýrstardy ekonomıkanyń sapaly ósýine jumyldyrýy kerek. Qazirgi jaǵdaıda bul ońaı sharýa emes. Sondyqtan osy baǵyttaǵy kúsh-jigerdi eseleı túsý qajet», - dedi Oljas Bektenov.

Buǵan deıin Oljas Bektenov úshinshi toqsannyń qorytyndysy boıynsha el ekonomıkasynyń ósý dınamıkasy oń nátıje kórsetkenin aıtqan edi.

Sondaı-aq, 9 aıda bıýdjetke 14,9 trln teńge kiris kirgen.