Premer-mınıstr aerotaksı men basqa da ushý apparattaryna qatysty tapsyrma berdi
ASTANA. KAZINFORM — Kólik mınıstrligi maýsym aıynyń sońyna deıin qalalyq áýe utqyrlyǵy máseleleri boıynsha zańnamalyq túzetýlerdi qabyldaýdy qamtamasyz etýi kerek. Bul týraly Úkimet otyrysynda Premer-mınıstr Oljas Bektenov aıtty.
— Kólik mınıstrligi osy jyldyń sońyna deıin Azamattyq avıatsııany damytýdyń 2050-shi jylǵa deıingi master-josparyn (SAMR-2050) bekitý jóninde sharalar qabyldasyn. Shaǵyn jáne óńirlik avıatsııany, pılotsyz áýe kóligin damytý, sondaı-aq jańa balamaly otyndy paıdalaný men saqtaýdyń ozyq tehnologııalaryn engizý sharalary mindetti túrde kózdelýge tıis. Ekinshiden, Eýropadaǵy EASA jáne AQSh-taǵy FAA sııaqty álemdik retteýshiler kommertsııalyq aerotaksı apparattaryn sertıfıkattaý qaǵıdalaryn ázirlep qoıdy. Biz de aerotaksı, drondar men basqa da ushý apparattarynyń jańa túrlerin iske qosýǵa daıyn bolýymyz kerek. Kólik mınıstrligi bıylǵy maýsym aıynyń sońyna deıin qalalyq áýe utqyrlyǵy (UAM) máseleleri boıynsha qajetti zańnamalyq túzetýlerdi qabyldaýdy qamtamasyz etsin, — dedi Oljas Bektenov.
Sonymen qatar Úkimet basshysy Shyǵys Qazaqstan, Mańǵystaý, Qostanaı, Pavlodar oblystarynyń ákimdikteri belgilengen merzimderdi qatań saqtaı otyryp, Katonqaraǵaı, Zaısan, Kendirli jáne Arqalyq áýejaılaryn bıyl ýaqtyly paıdalanýǵa berip, sondaı-aq Pavlodardaǵy áýejaıdy jańǵyrtý jumystaryn aıaqtaýy kerek ekenin aıtty.
— Jalpy alǵanda, Kólik mınıstrligi áýe kompanııalarymen jáne áýejaı qyzmetterimen birlesip, ósip kele jatqan jolaýshylar aǵynyna sapaly, jaıly ári jedel qyzmet kórsetýdi qamtamasyz etý boıynsha turaqty jumys júrgizýi qajet, — dedi Premer-mınıstr.
Buǵan deıin qazaqstandyq áýe kompanııalaryna Taıaý Shyǵystaǵy jaǵdaı qalaı áser etip jatqanyn jazǵan edik.
2025 jyly qazaqstandyq áýe kompanııalar 15 mln jolaýshy tasymaldady. Bıylǵy alǵashqy 4 aıda jolaýshylar sany 4 mln-nan asty.
