Premer-mınıstr: 8 trln teńgeden asatyn ótinim bıýdjetten alynyp tastaldy
ASTANA. KAZINFORM – AMANAT partııasy fraktsııasynyń keńeıtilgen otyrysynda Premer-mınıstr Oljas Bektenov Úkimet mańyzy az shyǵyndardy qysqartý jáne bıýdjetti ońtaılandyrý jumystaryn jalǵastyryp jatqanyn atap ótti. Bul týraly Úkimettiń baspasóz qyzmeti habarlady.
– Bıýdjet shyǵyndaryna qatysty aıtar bolsaq, biz olardy qysqartý qajet ekenin túsinip otyrmyz jáne osy baǵytta jumys júrgizip jatyrmyz. Mysaly, 2025 jyldyń bıýdjeti qalyptastyrylǵan kezde bıýdjettik baǵdarlamalar ákimshileriniń mańyzsyz shyǵyndarǵa qatysty ótinimderi alynyp tastaldy. Jalpy 34 trln teńgege ótinim kelip tústi, sonyń ishinde biz tek 25 trln 700 mlrd teńgesin ǵana qanaǵattandyrdyq, – dep atap ótti Premer-mınıstr.
Oljas Bektenov Úkimette shyǵyndardy ońtaılandyrý jumysy turaqty negizde júrgizilip otyrǵanyn atap ótti.
– Árıne, memlekettik organdardyń aǵymdaǵy shyǵyndary únemi qaıta qaralyp otyrady. Biz ekonomıkalyq tıimsiz shyǵyndardy qysqartamyz, – dep atap ótti Premer-mınıstr.
Sonymen qatar Premer-mınıstr Oljas Bektenov tarıftik reformany jalǵastyrý jáne energetıka men kommýnaldyq sektorlarda Ulttyq jobany júzege asyrý qajettigin atap ótti.
– Bul jumys 2023 jyly bastalyp, 2024 jyly jalǵasyn tapty jáne bıyl da júrgizilip jatyr. Eki jarym jyl ishinde ınjenerlik ınfraqurylymdy, jylý kózderin, túrli jelilerdi jańǵyrtýǵa 600 mlrd teńgeden astam ınvestıtsııa tartyldy. Sonyń nátıjesinde tozý deńgeıi 6,2%-ǵa tómendedi. Qıyndyqtarǵa qaramastan, biz bul jumysty jalǵastyrýǵa nıettimiz, óıtkeni qazirgi zamanǵa saı jańǵyrtylǵan turǵyn úı-kommýnaldyq sharýashylyq júıesin qalyptastyrǵymyz keledi, – dep atap ótti Oljas Bektenov.
Premer-mınıstr energetıka jáne kommýnaldyq sektorlardy jańǵyrtýǵa arnalǵan ulttyq joba «Tarıfti ınvestıtsııaǵa aıyrbastaý» baǵdarlamasynyń jalǵasy bolyp tabylatynyn aıtty.
– Energetıka jáne kommýnaldyq sektorlardy jańǵyrtýǵa arnalǵan ulttyq joba qabyldandy, iske asyrylyp jatyr. Ol «Tarıfti ınvestıtsııaǵa aıyrbastaý» baǵdarlamasyn 2029 jylǵa deıin jalǵastyrýdy kózdeıdi. Ulttyq joba aıasynda qabyldanyp jatqan sharalardyń arqasynda biz tozý deńgeıin 40%-ǵa deıin tómendetýdi josparlap otyrmyz. Bul, bizdiń oıymyzsha, qalypty jaǵdaıǵa jetkizip, kúzgi-qysqy kezeńdi turaqty ótkizýge múmkindik beredi. Bul jumysty jalǵastyrýǵa nıettimiz, – dedi Oljas Bektenov.
Aıta keteıik, AMANAT partııasy fraktsııasynyń keńeıtilgen otyrysynda Premer-Mınıstr Oljas Bektenov Úkimet áleýmettik-ekonomıkalyq damý boljamyn jáne aldaǵy úsh jyldyq kezeńge arnalǵan respýblıkalyq bıýdjet jobasyn maquldap, Parlamentke engizgenin málimdedi.