Premer-mınıstr 1 mamyrǵa deıin jol boıyndaǵy servısti damytý kartasyn ázirleýdi tapsyrdy
ASTANA. KAZINFORM — Premer-mınıstr Oljas Bektenov jol qaýipsizdigi máselesi ózekti bola túskenin, 1 mamyrǵa deıin jol qozǵalysy qaýipsizdigi boıynsha birlesken is-qımyl josparyn jańartýdy tapsyrdy.
— Jol qaýipsizdigi — eń ózekti máseleniń biri. Byltyr 36 myńnan astam jol-kólik oqıǵasy bolǵan. Sondyqtan apat qaýpi joǵary ýchaskelerde ınjenerlik sheshimderdi qoldaný, jyldamdyq rejımin qatań baqylaý, ıntellektýaldy kólik júıelerin jáne zamanaýı eskertý quraldaryn paıdalaný boıynsha júıeli sharalar keshenin iske asyrý qajet, — dedi O. Bektenov Úkimettiń búgingi otyrysynda.
Premer-mınıstr Kólik mınıstrligine Іshki ister, Tótenshe jaǵdaılar mınıstrlikterimen jáne ákimdiktermen birge 1 mamyrǵa deıin jol qozǵalysy qaýipsizdigin qamtamasyz etý boıynsha birlesken is-qımyl josparlaryn jańartýdy tapsyrdy.
Sonymen birge, kólik kóp júretin avtomagıstraldar men iri qalalarǵa kiretin joldarǵa basa nazar aýdarý qajettigi aıtyldy.
— Kólik ınfraqurylymyn keshendi damytý júrgizýshilerge qolaıly jaǵdaı jasaýmen tikeleı baılanysty. Kólik mınıstrligi ákimdiktermen birge tıisti standarttar men bıznesti yntalandyrý sharalaryn qamtamasyz etip, 1 mamyrǵa deıin ár óńirde jol boıyndaǵy servısti damytýdyń egjeı-tegjeıli kartasyn ázirlesin, — dedi Oljas Bektenov.
Buǵan deıin O. Bektenov joldardyń múshkil jaǵdaıyna qatysty azamattar shaǵymy azaımaı turǵanyn aıtqan edi.
Sondaı-aq, elimizde aqyly joldar qataryna taǵy 6 ýchaske qosylady. Aqyly jolda aqaý anyqtalsa, tólem ýaqytsha toqtatylady.
