Premer-lıgaǵa joldama alǵan «Altaı Óskemen» fýtbol klýbynyń daıyndyǵy qalaı
ÓSKEMEN. KAZINFORM — Araǵa 13 jyl salyp Qazaqstan Premer-lıgasyna joldama alǵan «Altaı Óskemen» fýtbol klýby jańa maýsymǵa qyzý daıyndyq júrgizip jatyr. Oblys ákimdigi klýbqa qoldaý retinde 1,5 mlrd teńge bólmek.
Klýbqa legıoner tartýǵa bolmaıdy
ShQO dene shynyqtyrý jáne sport basqarmasy Premer-lıgaǵa joldama alǵan «Altaı Óskemen» fýtbol klýbynyń erler jáne áıelder komandasyn qoldaýǵa arnalǵan tenderdi memlekettik satyp alý portalynda jarııalady.
Bolashaq merdiger mindetine tek oqý-jattyǵý barysy men logıstıkany uıymdastyrý ǵana emes, klýb stadıonyn Qazaqstan fýtbol federatsııasy (QFF) men ÝEFA-nyń qatań talaptaryna sáıkestendirý de kiredi. Atap aıtqanda, VAR júıesin ornatý, LED-ekrandardy qoıý qarastyrylǵan. Sondaı-aq bapkerler shtaby men medıtsınalyq personaldyń biliktiligine erekshe mán berilip, olardyń tıisti lıtsenzııalary men sertıfıkattary bolýy talap etiledi. Bıýdjet qarajaty esebinen legıoner fýtbolshylardy tartýǵa qatań tyıym salynǵan.
Tehnıkalyq sıpattamada sportshylardy mindetti saqtandyrý, klýb qyzmetin medıalyq turǵyda jarııalaý, matchtardyń múmkindigi shekteýli jandar men sport ardagerleri úshin qoljetimdi bolýyn qamtamasyz etý talaptary da naqty kórsetilgen.
Aıta keterligi, maýsym qorytyndysyna qatysty qatań talaptar qoıylǵan joq. Komanda júldeli oryn alsa da, nemese jaı chempıonatqa qatyssa da jetkilikti. Medalsiz qalǵany úshin eshqandaı sanktsııa qarastyrylmaıdy.
Ótken jyly jarııalanǵan tenderdi «Altaı Óskemen» fýtbol klýby» qoǵamdyq qory utqan. Olar 800 mln teńgeden astam qarjyny tolyq ıgergen. Sonyń nátıjesinde komanda Birinshi lıgada úzdik úshtikke enip, Premer-lıgaǵa joldama aldy. Óskemen qalasy QPL-de 2013 jyldan beri alǵash ret qaıtadan baq synaǵaly tur.
Keı fýtbolshymen kelisimshart uzartyldy
Ótken jyldyń sońynda «Altaı» klýby resmı seriktesi dep «Qaztsınk» kompanııasyn jarııalaǵan. 2026 jyldyń basynda komandanyń negizgi oıynshylary — Sergeı Hıjnıchenko, Almas Saparǵalıev jáne Aslan Januzaqovpen kelisimsharttar uzartylǵanyn málimdedi.
Qańtardyń 10-y kúni klýb qos qorǵaýshy Tımýr Redjepov pen Gavrıl Kan, shabýylshy Ádilet Omarbekpen de kelisimshartty uzartty. Vahıd Masýdov bas bapker bolyp qala bermek.
Aıta keteıik, óńir bıligi bıyl Óskemende ÝEFA-nyń úshinshi sanatyna sáıkes keletin fýtbol stadıonynyń qurylysy bastalatynyn habarlady. Alaıda bul jobaǵa qansha qarajat jumsalatyny jáne sport nysanynyń qurylysyna kim demeýshi bolatyny ázirge naqtylanǵan joq. Atalǵan stadıon 5000 adamǵa shaqtalmaq. ShQO dene shynyqtyrý jáne sport basqarmasynyń basshysy Asqar Mojanovtyń aıtýynsha, qańtar aıynda esep-qısapty tolyqtaı ázirlep, kóktemge qaraı qurylys qamyna kirisý josparlanyp otyr.
Oıyndar basqa stadıonda ótýi múmkin
Qaı sportty alsaq ta, úzdik nátıje ozyq ınfraqurylymmen ólshenedi. Muny oblys ákimdigi de, Dene shynyqtyrý jáne sport basqarmasy basshylyǵy da túsinip otyr.
Qazaqstan Fýtbol federatsııasy ókilderi birneshe kún buryn Óskemenge arnaıy baryp, stadıon jaǵdaıymen tanysyp qaıtty. Qazir onda qaıta jańǵyrtý jumysy júrip jatyr. Sáýir aıynda aıaqtalýy múmkin. Al Qazaqstan Premer-lıgasy naýryzda bastalatynyn eskersek, fýtbolshylar kemi bir oıyndy basqa stadıonda ótkizedi. Rezevrvti stadıon týraly ázirge aqparat shyqpady.
Taǵy bir aıta keterligi, jýyqta ǵana óskemendik Islam Chesnokov shotlandııalyq «Harts» komandasyna aýysty. Bul jergilikti jastarǵa edáýir jiger berdi.
Eske salsaq, osyǵan deıin «Arsenal» — «Qaırat» matchynyń bıletteri satylymǵa shyqqany jaıly jazǵanbyz.