Premer-lıgaǵa joldama alǵan «Altaı Óskemen» fýtbol klýbyn qandaı ózgerister kútip tur
ÓSKEMEN. KAZINFORM – Óskemendik fýtbolshylar araǵa 13 jyl salyp Qazaqstan Premer-lıgasyna joldama aldy. Osy ýaqyt aralyǵynda klýb talaı ózgeristi bastan ótkerdi. Ekinshi lıgadaǵy oıyndarynyń ózi jergilikti jankúıer kóńilinen shyqpaǵan kezder de boldy. Degenmen sońǵy 2-3 jyldaǵy ózgeris talaıdy tańǵaldyrdy. Kazinform tilshisi shyǵysqazaqstandyq fýtbol klýbyndaǵy serpilistiń sebebine úńilip kórdi.
Turaqtylyq tuǵyrǵa kóteredi
2016 jylǵa deıin óskemendik ujym «Vostok» dep atalatyn. Sheteldik bapkerler kelip, bilgenimen bólisip, ózderi tıimdi dep sanaǵan oıyn taktıkasyn qoıdy. Biraq túptep kelgende klýbtyń ishki chempıonattaǵy qadamy únemi sátti bola qoımady. Kóp másele qarjyǵa kelip tirelgen.
Óńir fýtbolynyń janashyry, bilikti bapker Jandos ıÝsýbalıev klýbta buǵan deıin nege keri ketý bolǵanyn aıtyp bergen-di.
- Meniń oıymsha, materıaldyq-tehnıkalyq bazany damytpaı, nátıje kórsetý qıyn. Eger klýb aıaqqa turamyz dese, jańa stadıon salý qajet. Jattyǵý qysta da jalǵasý úshin tóbesi jabyq manej bolýy kerek, - degen bolatyn bapker.
Osy rette oblystyq Dene shynyqtyrý jáne sport basqarmasy basshylyǵyna birneshe ret saýalhat jiberip, aqparat aldyq. Máselen, byltyr «Altaı Óskemenniń» aldynda Birinshi lıgaǵa ótý mejesi turdy. Az ýaqytta oǵan jetý múmkin emes kóringenimen, bapkerlik quram jospardy tolyq oryndady. Halyqaralyq tájirıbege ıe, lıtsenzııasy bar jergilikti jattyqtyrýshylar tartyldy. Demek qarjy jaǵy rettele bastaǵan. Buǵan jankúıerler de dán rıza boldy.
- Qandaı jaǵdaı bolsa da, óz komandama adal jankúıer bolyp qala beremin. Jeńispen qatar jeńilis te bar. Biraq qysta jattyǵatyn jer bolmaǵan soń, úlken alańda dop tebetin keı oıynshy fýtzalǵa aýysady. Sol jerde jaraqat alyp qala ma dep qorqamyn. Áıtpese, óńirde talanty jastar kóp, - dedi komanda jankúıeri Erkebulan Aǵzamov.
Fýtbol klýbynyń oıyndary ótetin «Vostok» stadıonynda belsendi jankúıerler toby qurylyp, qyrkúıek kezinde qatary molaıyp qaldy.
- Estıtinimiz jeńis, klýbtyń resmı paraqshasynan kóretinimiz ádemi goldar. Eń bastysy, komandada tártip bar. Ár oıynnan qalmaı keletinder sany da kóbeıe bastady, - deıdi jankúıerler.
Klýbtyń jattyqtyrýshysy - Jambyl óńiriniń týmasy, qazaqstandyq talaı klýbta dop teýip, 90-shy jyldary Germanııanyń Proıssen 07, Gettıngen 05 ujymynda oınaǵan Vahıd Masýdov. Ol jartylaı qorǵaýshy retinde Qazaqstan namysyn da qorǵap, 1986-shi jyly KSRO sport sheberi atanǵan. Keıin bapker retinde kóptegen klýbta ter tókti. Chempıondar lıgasynda endi qarqyn ala bastaǵan «Qaıratqa» da, birneshe jylda eńse tiktep úlgergen «Elimaıǵa» da eńbegin sińirdi.
Búginde «Altaı Óskemenge» aıaldaǵan. Onyń jetekshiligimen fýtbolshylar bıylǵy maýsymda Birinshi lıgada úshinshi oryndy ıelenip, Premer-lıgaǵa joldama aldy.
Bıylǵy bıýdjet qandaı?
Osylaısha, araǵa attaı 13 jyl salyp, óskemendik fýtbolshylar Qazaqstandaǵy kil myqty ujymdarmen oınaýǵa qaıta múmkindik aldy. Endi fýtbol stadıony salynýy qajet. Muztaýdyń muzbalaǵy Oralhan Bókeı «Bizdiń jaqta qys uzaq» dep jazǵandaı, Altaıdyń klımaty qatal.
Kúzdiń sońǵy aılarynda dalada dop tebý múmkin emes. Jergilikti klýbtyń jeńisi, qarjy jaǵynan turaqtylyqty, ári tóbesi jabyq fýtbol stadıonyn salýǵa negiz boldy. Ol týraly Dene shynyqtyrý jáne sport basqarmasynyń basshysy Asqar Mojanov málim etti.
Ol stadıon 5000 adamǵa shaqtalmaq. Keı qalada 20-30 myńdyq stadıon baryn eskersek, Óskemendegi nysan áldeqaıda shaǵyn bolǵaly tur. Nege olaı? Asqar Mojanov munyń sebetin Shyǵystyń klımatymen baılanystyrdy. Bul tóbesi jabyq stadıon bolatyndyqtan joba qyrýar qarajatty qajet etetini taǵy bar. Esesine, UEFA talaptaryna tolyq saı keletindeı etip salynbaq.
- Qazaqstan chempıonaty elimizde naýryz aıynda bastalady. Al bizde kóp jerde áli qar jatady, kún de asa bir jylyna qoımaıdy. Osy jaǵy eskerildi. Jer ýchaskesi tańdaldy. Qańtar aıynda esep-qısap tolyqtaı ázirlenip, kóktemge qaraı qurylys qamyna kirisemiz, - dedi basqarma basshysy.
Qaı sportty alsaq ta, úzdik nátıje ozyq ınfraqurylymmen ólshenetini belgili. Muny oblys bıligi de túsinip otyr. Tóbesi jabyq fýtbol stadıonynyń qurylysy bitkenshe, Premer-lıga matchtary «Vostok» stadıonynda ótedi. Ondaǵy kıim aýystyrý, jýyný bólmeleri tolyqtaı jóndeýden ótip, stadıon mańyndaǵy shamdar jańartylady. Oǵan qosa, atalǵan stadıon jańartýdy qajet etse de, UEFA talaptaryna saı kelip tur. Bul eń mańyzdysy.
2026 jylǵy maýsymǵa komanda bıýdjeti áli kelisilip jatyr. Ázirge naqty bekitilmegen.
- 2025 jylǵy maýsymda komanda Birinshi lıgada óner kórsetkende jalpy bıýdjet shamamen 300 mln teńgeni qurady. Bıyl fýtbolshylardyń ortasha aılyǵy tájirıbesine, komandadaǵy róline jáne kelisimsharttyń jekelegen sharttaryna qaraı 300-500 myń teńge aralyǵynda, - delingen Dene shynyqtyrý jáne sport basqarmasy usynǵan aqparatta.
Ekinshi lıgadan Birinshi lıgaǵa ótkende klýb quramynda biryńǵaı shyǵysqazaqstandyq jigitter dop tepken. Bıyl da solaı. Bir esepten, Qazaqstan Birinshi lıgasynyń reglamenti sheteldik fýtbolshylardyń oınaýyna ruqsat bermeıdi.
Klýbty kimder kúsheıtýi múmkin?
Endi daıyndyqtyń ońtaıly júıesin quryp, komandany birtindep kúsheıtý kerek. Fýtbolshylardyń ortasha jasy – 22-23. Vahıd Masýdovtyń bapker retinde shaqyrylýy Premer-lıgaǵa shyǵýǵa daıyndyq strategııasynyń biri bolypty. Ol óz sózinde óskemendik ujymmen jumysty bastaǵanda fýtbolshylardyń oıyn taktıkasy birden bekitilgenin aıtady.
Munyń artynda shyǵysqazaqstandyq bapkerlerdiń biliktiligi tur.
- Klýb dırektory Nartaı Chambılov pen sporttyq dırektory Alekseı Shakındi erekshe atap ótkim keledi. Fýtbolshylardyń ózara tileýlestigi men aýyzbirshiligi unaıdy. Ár oıyndy qalt jibermeı, kelip, qoldaý bildiretin jankúıerlerge zor alǵys!, - dedi bas bapker.
Eýropanyń úzdik ujymdarymen kezdesip júrgen qazaqstandyq azýly klýbtar endi Óskemenge jıi keletindikten maýsym aldynda klýbty tájirıbeli oıynshylarmen tolyqtyrý josparda bar.
Kimder keletini ázirge naqtylanbady. Degenmen basqarma basshylyǵy qazir jergilikti tárbıelenýshilerdi daıarlaýǵa basa mán berilip jatqanyn málimdedi.
Óńir jurtyna fýtbol meıramyn ákelgen Almas Saparǵalıev, Asylbek Seıitqalıev, Sergeı Hıjnıchenko, Seıf Popov jáne basqa da fýtbolshylar klýbtyń joǵary dıvızıonda turaqtap qalýyna baryn salmaq. Alǵa qoıylǵan meje sondaı. TOP klýbtar Óskemenge kelmeı turyp, alań sapasy jaqsartylady. Qazir klýb «Vostok» stadıonynda Premer-lıga oıyndaryn ótkizý úshin qajetti sertıfıkat alý jumysyn júrgizip jatyr.
Eske salsaq, osyǵan deıin Qyzylorda fýtbol klýbynyń bapkeri aýysqany habarlanǵan.