Premer-lıgada «Atyraý» «Shahterden» basym tústi

ASTANA. KAZINFORM — Búgin fýtboldan Premer-lıga komandalary arasyndaǵy el birinshiliginiń 18-týrynda eki oıynnyń nátıjesi belgili boldy.

Eki oıynnyń birinde «Atyraý» óz alańynda Qaraǵandynyń «Shahterin» qabyldady. 

Atyraýlyq klýb sońǵy tórt týrda jeńiske jete almaı keldi. Úsh márte teń tússe, bir márte qarsylasyna ese jiberdi. Sondyqtan búgingi kezdesýde olar úsh upaı oljalaýǵa kúsh saldy. 

Kezdesýde Nıkolaı Sıgnevıch 27-mınýtta soqqan gol «Atyraýǵa» jeńis alyp keldi. 

Osylaısha «Atyraý» qarsylasynan 1:0 esebimen basym tústi.

Sondaı-aq taǵy bir kezdesýde «Elimaı» (Semeı) men «Qyzyljar» (Petropavl) sheberlik baıqasty. 

Bul kezdesýde komandalar tartysty oıyn órbitti. Aldymen petropavldyq klýbtan Lýka Imnadze 44-mınýtta esep ashsa, odan keıin semeılik ujymnan Ivan Svırıdov 52, Roman Mýrtazaev 75-mınýtta mergendik tanytty.

Bul oıynda «Elimaı» 2:1 esebimen basym túsip, úzdik úshtikke jaqyndaı tústi.

Endi 20:00–de «Qaısar» (Qyzylorda) men «Jetisý» (Taldyqorǵan) oınaıdy. 

Al 25 tamyzda 18:00–de «Qaırat» (Almaty) pen «Tobyl» (Qostanaı) sheberlik baıqasady.

Sol kúni 20:00–de «Ordabasy» (Shymkent) men «Aqtóbe» jasyl alańǵa shyǵady.

Bul týrdaǵy «Jeńis» (Astana) men «Astana» kezdesýi 29 qyrkúıekke shegerildi.