Premer-lıga: «Qaırat» syrt alańda «Shahterdi» iri eseppen jeńdi

ASTANA. KAZINFORM - Fýtboldan Qazaqstan Premer-lıgasynyń HV týrynda almatylyq «Qaırat» syrt alańda Qaraǵandynyń «Shahterin» oısyrata jeńdi.

Bıyl almatylyq ujym jaqsy oıyn órnegimen kózge túsip keledi. Nátıjesinde týrnır kestesinde úzdik úshtikten kórinip tur.

Kezdesý barysynda «Qaırat» sapynan Gıorgı Zarıa 30, Joao Paolo 49, Vıacheslav Shvyrev 97-mınýtta gol soǵyp ketti.

Osylaısha almatylyq klýb qarsylasynan 3:0 esebimen basym túsip, týrnır kestesinde 25 upaımen ekinshi orynǵa kóterildi. Bul jóninen kósh basynda kele jatqan «Ordabasy» komandasymen upaı sany teńesti. Dese de almatylyq klýbtyń olardan eki oıyny kóp.

Dál qazir «Elimaı» (Semeı) men «Jeńis» (Astana) kezdesýi ótip jatyr.

Sondaı-aq, 28 shildede «Jetisý» (Taldyqorǵan) men «Ordabasy» (Shymkent), «Aqtóbe» men «Qyzyljar» (Petropavl) oınaıdy.

Al «Qaısar» (Qyzylorda) men «Astana», «Turan» (Túrkistan) men «Tobyl» (Qostanaı) kezdesýleri keıinge qaldyryldy.

Eske salsaq, fýtboldan birinshi lıgada «Kaspıı» bes oıyn boıy jeńe almaı keledi.