Premer-lıga: «Elimaı» men «Jeńis» kezdesýi taǵdyryn jalǵyz gol sheshti

ASTANA. KAZINFORM - Fýtboldan Qazaqstan Premer-lıgasynyń HV týrynda semeılik «Elimaı» elordalyq «Jeńisti» jeńip ketti.

Kezdesý barysynda komandalar qyzyqty oıyn ótkizdi. Dese de fýtbolshylar dittegen maqsatyna jete almaı jatty. Keıbir sátte olarǵa dáldik jetispedi. Birinshi kezeńde qaqpadan sańylaý tabylmady. 

Ekinshi kezeńde eki komandanyń da esepti ózgertýge múmkindigi boldy. Oıynnyń 71-mınýtynda Nıkıta Korzýn soqqan jalǵyz gol kezdesý taǵdyryn sheshti.

Osylaısha «Elimaı» qarsylasyn 1:0 esebimen tize búktirip, týrnır kestesinde tórtinshi orynǵa kóterildi.

Sondaı-aq, 28 shildede «Jetisý» (Taldyqorǵan) men «Ordabasy» (Shymkent), «Aqtóbe» men «Qyzyljar» (Petropavl) oınaıdy.

Al «Qaısar» (Qyzylorda) men «Astana», «Turan» (Túrkistan) men «Tobyl» (Qostanaı) kezdesýleri keıinge qaldyryldy.

Eske salsaq, budan buryn almatylyq «Qaırat» syrt alańda Qaraǵandynyń «Shahterin» 3:0 esebimen oısyrata jeńdi.

Kezdesý barysynda «Qaırat» sapynan Gıorgı Zarıa 30, Joao Paolo 49, Vıacheslav Shvyrev 97-mınýtta gol soǵyp ketti.