Premer-lıga: «Astana» tórt oıyn boıy jeńiske jete almaı keledi

ASTANA. KAZINFORM - Fýtboldan Qazaqstan Premer-lıgasynyń on birinshi týry máresine jetti.

Bul týrdaǵy negizgi oıyn elordalyq «Astana» men shymkenttik «Ordabasy» komandalary arasynda ótti.

Kezdesý taǵdyryn jalǵyz gol sheshti. Ony shymkenttik klýbtan Erkebulan Tuńǵyshbaev 77-mınýtta óziniń enshisine jazdy.

Osylaısha «Ordabasy» qarsylasynan 1:0 esebimen basym túsip, týrnır kestesinde 19 upaımen ekinshi orynǵa kóterildi.

Elordalyq komanda qatarynan tórt oıyn boıy jeńiske jete almaı júr. Saldarynan týrnır kestesinde toǵyzynshy oryndy mise tutyp tur.

Sondaı-aq 16 maýsymda ótken «Elimaı» (Semeı) men «Aqtóbe» , «Jetisý» (Taldyqorǵan) men «Jeńis» (Astana) 2:2 esebine qanaǵat bildirdi.

Al 15 maýsymda ótken oıyndarda «Tobyl» «Qaıratty» 1:0 esebimen jeńse, «Shahter» óz alańynda «Atyraýǵa» 1:3 esebimen ese jiberdi.

Taǵy bir kezdesýde «Qaısar» men «Turan» 1:1 esebimen teń tústi.

Endi on ekinshi týr oıyndary 22 jáne 23 maýsym kúnderi ótkiziledi.