Premer-lıga: «Astana» syrt alańda «Qyzyljardan» basym tústi

ASTANA. KAZINFORM - Búgin, 22 maýsymda fýtboldan Qazaqstan Premer-lıgasynyń on ekinshi týrynda elordalyq «Astana» petropavldyq «Qyzyljardan» basym tústi.

Elordalyq komanda tórt týr boıy jeńiske jete almaı keledi. Eki kezdesýde jeńiliske ushyrasa, ekeýinde teń nátıjege qanaǵat bildirdi. Saldarynan týrnır kestesinde orta bóligine túsip ketti.

Sondyqtan elordalyq klýb búgin jeńiske jetýge kúsh salatyny anyq edi.

Kezdesý barysynda qos komanda jeńiske jetýge bar kúshin saldy. Oıyn taǵdyryn 70-mınýtta Elhan Astanov oryndaǵan penaltı sheshti.

Elordalyq klýb osylaısha qarsylasynan 1:0 esebimen basym tústi.

Taǵy bir kezdesýde qyzylordalyq «Qaısar» syrt alańda taldyqorǵandyq «Jetisýdy» 2:1 esebimen jeńip ketti.

Endi 23 maýsymda «Atyraý» men «Tobyl», «Jeńis» pen «Ordabasy», «Turan» men «Elimaı», «Aqtóbe» men «Shahter» oınaıdy.

Eske salsaq, budan buryn fýtboldan birinshi lıgada «Jetisaı» qaıtadan kósh basyna shyqty.