Premer-lıga: «Astana» elordada «Qaısardy» iri eseppen jeńdi
ASTANA. KAZINFORM — Búgin Qazaqstan Premer-lıgasynyń keıinge qaldyrylǵan 19-týrynda «Astana» men «Qaısar» kezdesti.
Oıyn barysynda elordalyq klýbtan Aleksandr Marochkın 19-mınýtta esep ashsa, odan keıin Maks Ebong 21-mınýtta basymdyqty arttyrdy.
Oıynnyń 38-mınýtynda qyzylordalyq klýbtan Nurdáýlet Aǵzambaev esep aıyrmasyn qysqartsa, ekinshi kezeńde elordalyq klýbtan Ýsman Kamara 54, Nazmı Grıpshı 57, Marın Tomasov 61-mınýtta mergendik tanytty.
Osylaısha «Astana» qarsylasyn 5:1 esebimen jeńip, týrnır kestesinde 46 upaımen birinshi orynǵa kóterildi.
Atalǵan oıyn aldymen 3 tamyzǵa josparlanǵan edi. Degenmen sol ýaqytta kezdesýdiń ótetin kúniniń ózgerýine elordalyq klýbtyń UEFA Konferentsııa lıgasynda synǵa túsýi sebep boldy.
Degenmen olar jarysty úshinshi irikteý kezeńinde Shveıtsarııanyń «Lozanna» komandasynan (0:2, 1:3) jeńilip, eýrododadaǵy joryǵyn aıaqtady.
Sondaı-aq 22-týrdaǵy «Oqjetpes» (Kókshetaý) men «Qaırat» (Almaty) kezdesýi 31 tamyzǵa shegerildi. Bul sheshim almatylyq klýbtyń eýrokýbok oıyndaryna qatysýyna baılanysty qabyldanyp otyr.
Endi 23 týr oıyndary 13 jáne 14 qyrkúıek kúnderi ótkiziledi.
