Premer kameralardy kólik júrgizý kezinde telefonǵa telmirgen júrgizýshilerdi anyqtaýǵa baǵyttaýdy tapsyrdy
ASTANA. KAZINFORM — Joldardaǵy avtomattandyrylǵan júıeler kólik júrgizý kezinde telefon paıdalaný faktilerin barynsha anyqtaýǵa baǵyttalýǵa tıis. Bul týraly Úkimet otyrysynda Premer-mınıstr Oljas Bektenov aıtty.
— Jol-kólik oqıǵalarynyń negizgi bóligi eldi mekenderde oryn alady. Aıta ketý kerek, keıbir jol apattaryna kólik júrgizýshileriniń uıaly telefondardy paıdalanýy sebep bolady. Joldardaǵy avtomattandyrylǵan júıeler kólik júrgizý kezinde telefon paıdalaný faktilerin barynsha anyqtaýǵa baǵyttalýǵa tıis. Jalpy, Іshki ister mınıstrligi ákimdiktermen birlesip, ornatylǵan barlyq kameranyń jumysyn tekserip shyqqany jón, — dedi Oljas Bektenov.
Sondaı-aq Premer-mınıstr jaıaý júrginshilermen bolatyn oqıǵalarǵa bólek toqtaldy.
— Kóp jaǵdaıda oǵan jaıaý júrginshilerdiń ózderi kináli bolyp jatady. Sondyqtan joldy belgilenbegen jerden kesip ótetin adamdarǵa qatysty jaýapkershilikti qatańdatý qajet. Rettelmeıtin jaıaý júrginshiler ótetin jerlerde kólik júrgizýshileriniń kinásinen bolatyn jol apattary da az emes. Ákimdikterge osyndaı ýchaskelerde beınetirkeý júıelerin ornatý aýqymyn keńeıtýdi tapsyramyn. Ásirese bilim berý uıymdarynyń mańynda keri sanaý tablosy bar zamanaýı baǵdarshamdardy ornatýdy qamtamasyz etý qajet. Іshki ister mınıstrligi kóshelerdiń qaýipsiz dızaıny elementterin engizý boıynsha halyqaralyq tájirıbeni zerdeleýge tıis, — dedi Premer-mınıstr.
Buǵan deıin jol erejesin óreskel buzatyndar júrgizýshi kýáliginen 1 jylǵa aıyrylýy múmkin ekenin jazǵan edik.
