Premer Eýrazııalyq úkimetaralyq keńestiń shaǵyn quramdaǵy otyrysyna qatysty
ASTANA. KAZINFORM – QR Premer-mınıstri Oljas Bektenov Almatyda Eýrazııalyq úkimetaralyq keńestiń shaǵyn quramdaǵy otyrysyna qatysty. EAEO sheńberindegi memleketter arasyndaǵy yntymaqtastyqtyń ózekti máseleleri talqylandy.
Shaǵyn quramdaǵy EÚAK otyrysyna Odaqqa qatysýshy elder úkimetteriniń basshylary: Belarýs Respýblıkasy – Roman Golovchenko, Qyrǵyz Respýblıkasy – Adylbek Qasymalıev, Reseı Federatsııasy – Mıhaıl Mıshýstın, Armenııa Respýblıkasy vıtse-premeri Mger Grıgorıan, EEK alqasynyń tóraǵasy Baqytjan Saǵyntaev qatysty.
Oljas Bektenov Eýrazııalyq úkimetaralyq keńes alańyndaǵy halyqaralyq dıalogtiń mańyzdy ekenine toqtalyp, qabyldanǵan sheshimder ıntegratsııalyq úderisterdiń damýyna tyń serpin beretinine senim bildirdi.
Óz kezeginde, Belarýs Respýblıkasynyń Premer-mınıstri, EÚAK tóraǵasy Roman Golovchenko EAEO elderin tyǵyz ekonomıkalyq qatynastar men aýqymdy saýda aınalymy baılanystyratynyn atap ótti.
Tóraǵalyq etýshi taraptyń málimetinshe, búginde Odaqtyń JІÓ turaqty ósýdi kórsetip otyr. 2024 jyldyń qorytyndysy boıynsha Odaq ekonomıkasynyń jumys isteýiniń negizgi kórsetkishi shamamen 4%-dy quraıdy. Sonymen qatar 2030 jylǵa deıin EAEO sheńberinde ekonomıkalyq protsesterdi odan ári damytý týraly deklaratsııada, onyń ishinde álemdik ekonomıkany damytýdyń sońǵy úrdisterin, jańa tehnologııalar men ınnovatsııalardyń paıda bolýyn eskere otyryp, Odaqtyń jalpy kózqarasyna jaqyndaý úshin birlesken kúsh-jigerdiń qajettiligi atap ótildi.
Agroónerkásip keshenindegi óndiristiń turaqtylyǵyn arttyrýǵa jáne salanyń ınnovatsııalyq damýyn qamtamasyz etýge baǵyttalǵan birlesken jobalardy iske asyrýdy qoldaý tetigi talqylandy. Asyl tuqymdy mal sharýashylyǵyn, aýyl sharýashylyǵy daqyldarynyń selektsııasyn, tuqym sharýashylyǵyn damytý retinde, mal sharýashylyǵy, aýyl sharýashylyǵy ónimderin óńdeý, AÓK ınfraqurylymyn keńeıtý sııaqty baǵyttarǵa erekshe nazar aýdaryldy.
Sondaı-aq EAEO ıntegratsııalanǵan aqparattyq júıesin damytý perspektıvalary boıynsha pikir almasty. Atalǵan baǵyt boıynsha jumysty jandandyrý qajet ekeni atap ótildi.
EÚAK otyrysy keńeıtilgen quramda jalǵasady.
Aıta keteıik, búgin Qazaqstan men Qyrǵyzstan premer-mınıstrleri AÓK, ónerkásip jáne sý salasyndaǵy ózara is-qımyl máselelerin talqylady.