Premer eldegi epıdahýal týraly: Qajet bolsa, jyljymaly brıgada uıymdastyryńyzdar

ASTANA. KAZINFORM — Premer-mınıstr Oljas Bektenov Úkimet otyrysynda eldegi epıdemıologııalyq baqylaýdy turaqtandyrý baǵytyndaǵy sharalar qabyldaýdy tapsyrdy.

— Kórip otyrǵanymyzdaı, vırýstyq aýrýlardyń maýsymy bastaldy. Densaýlyq saqtaý mınıstrligine ákimdiktermen birlesip kómekke júgingen azamattarǵa kórsetiletin medıtsınalyq qyzmettiń sapasyn baqylaýǵa alýdy tapsyramyn. Qajet bolǵan jaǵdaıda statsıonarlarda qosymsha oryndar ashyp, jyljymaly mobıldi brıgadalardy uıymdastyrý qajet, — dedi ol.

Úkimet basshysy dári-dármekpen qamtamasyz etý máselesin erekshe nazarǵa alý qajettigin eskertti.

— Barlyq dárihanalarda vırýsqa qarsy preparattar jetkilikti bolýy tıis. Sondaı-aq, vırýstyq aýrýlardyń aldyn alý boıynsha túsindirý jumystaryn kúsheıtý qajet. Aqmaral Sháripbaıqyzy, jaǵdaıdy turaqty jeke baqylaýǵa alyńyz, — dedi Oljas Bektenov.

Eske salsaq, Pavlodarda balalar arasynda vırýsty ınfektsııa órship, aýrýhana naýqastarǵa tolyp qalǵan. Óńirlik balalar aýrýhanasynyń dárigerleri kúnine shamamen 100-120 balany qabyldap jatqandaryn aıtady.

Sonymen qatar Qaraǵandy oblysynda maýsymdyq juqpaly aýrýlar ósim kórsetip, syrqattanǵandardyń basym bóligin balalar qurap otyr.

Degenmen QR Densaýlyq saqtaý mınıstrliginiń resmı ókili Ásel Qydyrálıeva elimizde jańa tumaý shtamy tarap jatqan joq, epıdemıologııalyq jaǵdaı turaqty ekenin habarlady.