Premer: Bıýdjet esebinen iske asatyn jobalardyń qymbattaýyna jol bermeńizder
ASTANA. KAZINFORM – Úkimet basshysy Oljas Bektenov bıýdjet esebinen iske asatyn jobalardy kelisimshartta kórsetilgen somanyń kóleminde ǵana qarjylandyrýdy tapsyrdy.
- Bıýdjettik baǵdarlamalardyń ákimshilerine óz mindettemeleriniń oryndalýyna taldaý jasap, únemdelgen qarajatty neǵurlym basym mindetterge nemese Úkimet rezervine qaıta baǵyttaýdy tapsyramyn. Ákimdikter bıýdjettegi artyq qarajatty damý bıýdjetin keńeıtýge paıdalana alady. Bul rette bıýdjettik baǵdarlamalar ákimshileri jobalardyń qymbattaýyna jol bermeı, olardy sharttyq somalary sheginde júzege asyrýdy qamtamasyz etýge tıis, - dedi Premer-mınıstr úkimet otyrysynda.
Sondaı-aq ol mınıstrlikter men ákimdikterge jyldyq merzimde qarjylandyrylmaǵan qurylys-montaj jumystarynyń satyp alý rásimderin bastamaýdy tapsyrdy.
- Qarjy mınıstrligine óńir ákimderimen birlesip, memlekettik bıýdjet kiristeri boıynsha josparly kórsetkishterdi qamtamasyz etýdi tapsyramyn.
Qoryta aıtqanda, memlekettik jáne jergilikti atqarýshy organdar osy jyldyń josparly kórsetkishterine qol jetkizý úshin barlyq resýrstardy jumyldyrýǵa tıis, - dedi Oljas Bektenov.
Aıta keteıik, búgin Úkimette 11 aıdyń áleýmettik-ekonomıkalyq damý qorytyndysy qaralyp jatyr.