Premer Abaı oblysynda ındýstrııalyq jáne áleýmettik jobalardyń oryndalý barysyn tekserdi
ASTANA. KAZINFORM — Oblysqa jumys sapary aıasynda Premer-mınıstri Oljas Bektenov Prezıdenttiń aýyl sharýashylyǵy ónimderin qaıta óńdeý kólemin arttyrý, óńdeý ónerkásibin damytý, jańa jumys oryndaryn qurý jáne áleýmettik ınfraqurylymdy jetildirý jónindegi tapsyrmalarynyń oryndalý barysymen tanysty.
Sonymen qatar, Semeı qalasyndaǵy aýyl sharýashylyǵy ónimderin qaıta óńdeý kásiporyndary men tigin óndirisi nysanyn jáne Oqýshylar saraıyn aralap kórdi.
Premer-mınıstr «Agrolıder KAZ» JShS aýmaǵynda burshaq jáne maıly daqyldardy qaıta óńdeý zaýytynyń jumysymen tanysyp, daıyn ónimdi sertıfıkattaý zerthanasyn, óndiristik tsehtar men tehnologııalyq jelilerdi qarap shyqty. Kásiporynnyń qýaty jylyna 72 myń tonna shıkizatty quraıdy, daıyn ónim shyǵarý kólemi táýligine 160 tonnaǵa jetedi.
«Agrolıder KAZ» JShS-niń bas dırektory Nıkolaı Ýshakovtyń málimetinshe, zaýytty jaraqtandyrý kezinde Túrkııa men Italııanyń zamanaýı tehnologııalyq sheshimderi qoldanylǵan. Bul ónimdi qaıta óńdeý men býyp-túıýdiń joǵary deńgeıin qamtamasyz etip otyr. Qazir kásiporynda ónimniń 10-nan astam túri óndiriledi. Ónim ishki naryqqa jetkizilip, sondaı-aq Eýropa, Azııa jáne Latyn Amerıkasy elderine eksporttalady. Kompanııa fermerlik sharýashylyqtarmen suranysqa ıe daqyldardyń egis alqaptaryn keńeıtý baǵytynda jumys júrgizýde. Jobaǵa 4,1 mlrd teńge ınvestıtsııa tartylyp, 50 jumys orny ashylǵan.
Premer-mınıstr zaýyttyń iske qosylýy agroónerkásip keshenindegi qosylǵan quny joǵary ónim úlesin arttyrý jónindegi Prezıdent qoıǵan mindetterge tolyq sáıkes keletinin atap ótti.
— Memleket basshysy aýyl sharýashylyǵy ónimderin tereń óńdeýdi damytý, shıkizatty saqtaý jáne óńdeý qýattaryn ulǵaıtý, sondaı-aq syrtqy naryqtarǵa ótkizýge qoldaý kórsetý qajettiligin árdaıym atap ótip otyrady. AÓK ónimderiniń qaıta óńdelgen úlesin 70%-ǵa deıin arttyrý — bizdiń aldymyzda turǵan basyp mindetterdiń biri. «Agrolıder» kásiporny — Abaı oblysy úshin agroónerkásip kesheni salasyndaǵy strategııalyq joba. Kásiporyn óńirlik deńgeıde atalǵan tapsyrmalardyń júzege asyrylyp jatqanyn aıqyn kórsetedi, — dep atap ótti Oljas Bektenov.
Premer-mınıstr sondaı-aq «Qazaq-Astyq Group» JShS-nyń tolyq tsıkldi maı ekstraktsııalaý zaýytynda boldy. Zaýyt rafınadtalmaǵan kúnbaǵys maıyn, un, shrot, fosfatıdi bar kontsentrat jáne kúnbaǵys dániniń túıirshiktelgen qabyǵyn shyǵarady. Kásiporyn jylyna 300 myń tonna shıkizatty qaıta óńdeýge jetetin jobalyq qýatyna shyqty. 2025 jyldyń qorytyndysy boıynsha 112 myń tonna rafınattalmaǵan maı, 96,6 myń tonna shrot, 11,3 myń tonna túıirshik qabyq jáne 622 tonna fosfatıdi bar kontsentrat óndirildi. Eksport kólemi 112,7 myń tonna maı jáne 88,9 myń tonna shrotty qurady. Kásiporynda 414 adam jumys isteıdi. Qazir jobanyń ekinshi kezeńi, ıaǵnı, qýattylyǵy táýligine 200 tonna kúnbaǵys maıyn rafınattap, bólip quıýǵa jetetin óndiris orynynyń qurylysy júrýde. Ony paıdalanýǵa berý 2026 jyldyń úshinshi toqsanyna josparlanǵan, 111 jańa jumys orny qurylady dep kútilýde.
«Tehnoavıa-Qazaqstan» JShS-nyń «Tigin fabrıkasy» fılıalynda Premer-mınıstr óndiristik ǵımaratty aralap, shyǵarylatyn ónimdermen tanysty. Kásiporyn jylyna 170 myń ónim shyǵarady, jabdyqtar men jeliler 100% jumys kólemimen qamtylǵan. Fılıal dırektory Aınur Ahmetova bıyl naýryz aıynda kásiporyn qazaqstandyq taýar óndirýshilerdiń tizilimine engizilgenin habarlady.
Eger buryn barlyq ónim tek eksportqa jiberilip kelgen bolsa, endi zaýyt Qazaqstannyń ulttyq kompanııalary úshin de korporatıvtik kıim shyǵarýdy josparlap otyr. «Tehnoavıa-Qazaqstan» JShS bas dırektory Janat Ámirenov kelesi bir jańa joba — aıaq kıim fabrıkasy týraly baıandaǵan kezinde negizgi mindet — ımportty almastyrý ekenin jetkizdi.
Qazirgi ýaqytta kásiporynda 152 adam jumys isteıdi. Jańa joba aıasynda taǵy 200 jumys ornyn ashý josparlanýda. Keshendi iske qosý bıylǵa josparlanǵan.
Sapar barysynda áleýmettik ınfraqurylymǵa da erekshe nazar aýdaryldy. Premer-mınıstr Semeıdegi qurylysy aıaqtalǵan Oqýshylar saraıynyń daıyndyǵyn tekserdi. Nysan Memleket basshysynyń tapsyrmasy boıynsha, onyń ishinde qaıtarylǵan aktıvter jınaqtalatyn Arnaıy memlekettik qor qarajaty esebinen salyndy. Saraıda ǵylymı-tehnıkalyq, shyǵarmashylyq jáne sporttyq baǵyttar boıynsha qosymsha bilim alýǵa jaǵdaı jasalǵan.
Oljas Bektenov robototehnıka jáne baǵdarlamalaý kabınetterin, sensorlyq kabınetti, basseın, jekpe-jek, avıamodeldeý zaldaryn aralap kórdi. Saraıdyń jalpy aýdany 9,8 myń sharshy metrdi quraıdy, qyzmeti aýysymyna 500 orynǵa nemese kúnine 2 myńǵa deıin kelýshige arnalǵan. Balalardy qabyldaý jazǵy demalys kezeńinde bastalady dep josparlanǵan.
Abaı oblysy ákiminiń orynbasary Meıirlan Rahanov nysan iske qosylǵanda qalanyń sol jaǵalaýynda turatyn balalardyń qosymsha bilim alýǵa qoljetimdiligi edáýir keńeıetinin atap ótti. Munda bilim berýde erekshe qajettilikteri bar balalarǵa jaǵdaı jasaýǵa aıryqsha kóńil bólinedi.
Jumys saparynyń qorytyndysy boıynsha Premer-mınıstr Oljas Bektenov bastalǵan jobalardyń ýaqtyly júzege asyrylýyn qamtamasyz etýdi, qosylǵan quny joǵary ónim shyǵarýdy ulǵaıtýdy, jańa jumys oryndaryn qurýdy jáne ótkizý naryqtaryn odan ári keńeıtýdi tapsyrdy.
Budan buryn Bektenov Abaı oblysynda Tótenshe jaǵdaılardy joıý jónindegi respýblıkalyq jedel shtab otyrysyn ótkizgenin jazǵanbyz.
