Premer: Jeke adamdardyń tabysqa kenelýi jalpynyń múddesine zııan keltirmeýi kerek

ASTANA. QazAqparat – QR Premer-Mınıstri Álıhan Smaıylov Saýda jáne ıntegratsııa mınıstrliginiń keńeıtilgen alqa májilisinde áleýmettik mańyzy bar taýarlardyń shekti baǵasyn belgileý tásili nege qoldanystan shyqqanyn túsindirdi, dep habarlaıdy QazAqparat tilshisi.

«Búgingi jıynda baǵany qoldan tejeý tásilinen bas tartý kerektigi týraly da aıtyldy. Biz baǵany joǵarydan bekitýge bolmaıdy degen ustanymmen ishinara kelisemiz. Óıtkeni bul naryqtan tys tásil. Biz shekti baǵalardy paıdalanýdan bas tarttyq. Óıtkeni mundaı tásil ulttyq qaýipsizdikke, ekonomıkalyq qaýipsizdikke qaýip tóndiretin erekshe jaǵdaılarda ǵana bolýy múmkin dep sanaımyz. Qazir biz naryq yntalandyrý sharalaryn kóbirek qoldana bastadyq. Bul – aınalym shemasy, forvardtyq satyp alý, áleýmettik mańyzy bar azyq-túlik taýarlarynan kóretin tabystyń mólsherin belgileý, baǵanyń negizsiz kóterilmeýin baqylaý, sýbsıdııalaý, qarsy mindetteme sııaqty sharalar. Mundaı naryq ádisterin báribir qoldanýymyz kerek. Iá, biz ataýly kómek kórsetýdi jalǵastyramyz. Ony jyl saıyn kóbeıtip otyramyz. Biraq tutastaı alǵanda, ınflıatsııalyq fonǵa áser etetinin de eskerýimiz qajet», - dedi ol.

Úkimet basshysynyń aıtýynsha, keıbir josyqsyz kásipkerler, ásirese kóterme baǵamen jetkizýshiler, salyqtan jaltaryp, qosymsha marja tabý úshin túrli amaldarǵa barady.

«Qant naryǵynda bolǵan jaǵdaıda biz sondaı qubylysqa kýá boldyq. Jeke adamdardyń tabysqa kenelýi jalpy halyqtyń múddesine qaıshy kelmeýi kerek. Ondaıǵa jol bermeýimiz kerek», - dedi Álıhan Smaıylov.

Foto: primeminister.kz