Premer sheteldik ınvestorlarmen Qazaqstanda jańa jobalardy iske qosý máselesin talqylady
Premer-Mınıstr Álıhan Smaıylov Prezıdent janyndaǵy Sheteldik ınvestorlar keńesiniń 34-plenarlyq otyrysyna qatysý úshin Nur-Sultan qalasyna kelgen Eýropalyq qaıta qurý jáne damý bankiniń, Glencore jáne Philip Morris International kompanııalarynyń basshylarymen yntymaqtastyqty damytý barysyn talqylady.
Álıhan Smaıylov pen EQDB Prezıdenti Odıl Reno-Basso hanym Qazaqstan ekonomıkasyn dekarbonızatsııalaý jáne ártaraptandyrý, sondaı-aq bank sektory men kólik-logıstıka salasyn damytý boıynsha ekijaqty ózara is-qımyldyń keń aýqymdy máselelerin sóz etti.
Taraptar 30 jyldyń ishinde qarjy, ınfraqurylym, ShOB, agroónerkásiptik keshen jáne tsıfrlandyrý sııaqty basym salalarda quny $11 mlrd bolatyn 300-ge jýyq joba iske asyrylǵanyn aıtty.
«Ekonomıkalyq jáne tehnologııalyq saıasat jónindegi tıimdi usynymdar men qarjy resýrstaryna qoljetimdilik turǵysynan EQDB-nyń Qazaqstan ekonomıkasyn qoldaý jónindegi turaqty kúsh-jigeri bizdiń ornyqty damýymyzǵa serpin berip keledi. Ózara tıimdi yntymaqtastyqtyń ári qaraı da jalǵasatynyna úmittenemiz», - dedi Álıhan Smaıylov.
Óz kezeginde Odıl Reno-Basso EQDB atalǵan sektorlarda Qazaqstanmen birlesken jobalardy iske asyrýda zor áleýet baryn atap ótti.
Qazirgi ýaqytta bank dekarbonızatsııalaýǵa, jasyl tehnologııalar men jańartylatyn energııa kózderin damytýǵa salynatyn ınvestıtsııalar úlesin ulǵaıtyp jatyr, bolashaqta Qazaqstan da buǵan múddeli bolýy múmkin.
Glencore kompanııasynyń bas dırektory Gerı Neıglmen kezdesý aıasynda Qazaqstanda jańa jobalardy júzege asyrý perspektıvalary talqylandy.
Qazaqstan Glencore sııaqty strategııalyq seriktestermen uzaq merzimdi yntymaqtastyqty odan ári tereńdetýge daıyn.
«Kompanııa Qazaqstannyń taý-ken óndirý salasynda mańyzdy ról atqarady. Biz seriktestikti jalǵastyrýǵa jáne ózara is-qımyldyń jańa baǵyttaryn damytýǵa nıettimiz», - dedi Álıhan Smaıylov.
Philip Morris International kompanııasynyń Shyǵys Eýropa boıynsha prezıdenti Marko Marıottımen kezdesý barysynda QR Premer-Mınıstri kompanııanyń Qazaqstannyń qolaıly ınvestıtsııalyq ımıdjin nyǵaıtýǵa eleýli úles qosqanyn atap ótti.
