Premer-Mınıstrge «EvrazKaspıanStal» zaýytynda jańa tehnologııalardyń engizilýi baıandaldy
ASTANA. QazAqparat - Premer-Mınıstrge óndiriletin ónim kólemin ulǵaıtýǵa jáne onyń joǵary sapasyn qamtamasyz etýge múmkindik beretin óndiristi avtomattandyrý protsesi tanystyryldy, dep habarlaıdy primeminister.kz .
Baqytjan Saǵyntaevqa metallýrgııa zaýyty - reseılik seriktestermen birge iske asyrylǵan ınnovatsııalyq joba ekendigi aıtyldy. Óziniń tehnıkalyq jabdyqtalýy men protsesterdi avtomattandyrý deńgeıi boıynsha kásiporyn «Indýstrııalandyrý 4.0» Tórtinshi ónerkásiptik revolıýtsııa tujyrymdamasyna jaýap beredi.
Budan ózge, Eýrazııalyq ekonomıkalyq odaq sheńberindegi sharttar edáýir jaqsartyldy. Integratsııalyq úderister nátıjesinde daıyn ónimdi KO elderine eksporttaý kezinde kedendik rásimdeý qajettiligi joıyldy.
Zaýytta metaldy óńdeıdi jáne qaıta óńdeıdi, sondaı-aq armatýra, usaq surypty ılem jáne basqa da buıymdar shyǵarylady. Eki júzge jýyq metallýrg eńbek etetin kásiporynnyń qýaty jylyna 450 myń tonnany quraıdy.
Memleket basshysy N.Nazarbaev Qazaqstan halqyna «Qazaqstannyń úshinshi jańǵyrýy: jahandyq básekege qabilettilik» Joldaýynda eńbek ónimdiligin arttyrýdyń negizgi faktory retinde Tórtinshi ónerkásiptik revolıýtsııa elementterin jer-jerde engizýdi belgilegeni málim: bul avtomattandyrý, robottandyrý, jasandy ıntellekt, «úlken málimettermen» almasý.
