Premer-Mınıstrdiń orynbasary nelikten ıpotekanyń arzandamaı otyrǵanyn túsindirdi
Parlamentte «Halyqty turǵyn úımen qamtamasyz etýdiń jaı-kúıi men perspektıvalary» atty taqyrypta ótkenparlamenttik tyńdaýda QR Premer-Mınıstriniń orynbasary Qyrymbek Kósherbaev osylaı málimdedi.
«Bizdegi ıpotekalyq júıe nashar damyǵan. Nege? Jaýap aıqyn - qaryz qymbat, kredıt boıynsha stavka óte joǵary, búgingi ortasha stavka mólsheri 14-16 paıyzdy qurap otyr. Al ıpoteka arzandaýy úshin bankte uzaqmerzimdi ári arzan qarajattar kózi bolýy shart. Degenmen, álemdik qarjy júıesi basyna túsken bezgekten aıyqpaı turyp, ondaı resýrstarǵa qol jetkizý de ońaı bolmaıtyny aıqyn. Buny búgin moıyndaýymyz kerek jáne qajetsiz qurǵaq ýádemen jurtty adastyrmaýymyz kerek», - dedi Qyrymbek Kósherbaev.
Sonymen qatar, Úkimet basshysynyń orynbasary turǵyn úı qurylysyna qatysty qıyn ómirlik jaǵdaıǵa tap bolǵan azamattardyń máselesine de toqtalyp ótti. «Degenmen, Qazaqstan úlestik qaǵıdat boıynsha qurylys salyp, sonyń saldarynan urynǵandardyń jaýapkershiligin ózine alǵan álemdegi birden bir memleket ekenin esten shyǵarmaýymyz kerek. Bul rette biz aldanyp qalǵan úleskerlerdiń páterlerin qaıtarýǵa, bitirtip berýge kúsh salyp jatyrmyz. Bunda da negizgi másele tek bir basyna bir baspanany ǵana ıelik etpekshi bolǵan úleskerler týraly bolyp otyr. Jalpy zań boıynsha mundaı áreketterge jaýapkershilikti memleket óz moınyna almaýy kerek edi. Tek Elbasyniń saıası erik-jigeriniń arqasynda aldanyp urynǵan el azamattaryna járdem jasaldy», - dedi Qyrymbek Kósherbaev.
Bul rette Premer-Mınıstrdiń orynbasary elimizde aldap-arbaý jolymen jurtshylyqtyń qarajatyn ıelengisi keletin «kásipkerler» áli de bar ekenin aıta kele, «halyqty turǵyn úı máselesin «Qoljetimdi baspana» aıasynda sheshýge umtylýyn suraımyz», - dedi.
