Premer-Mınıstrdiń orynbasary kúrish baǵasyna pikir bildirdi

ASTANA. QazAqparat – QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın kúrish baǵasyna pikir bildirdi, dep habarlaıdy QazAqparat tilshisi.

«Aýyl sharýashylyǵy mınıstrligi málimdegen kúrish baǵasy shyndyqtan shalǵaıda jatyr. 1 keli kúrishti 250 teńgege qaıdan alýǵa bolady?», - dep surady Úkimet otyrysynan keıin BAQ ókilderi Serik Jumanǵarınnen.

«Aıtalyq, dúkenderde kelisi 250 teńgeden kúrish bar. Ózderińiz úshin eksperıment jasap, iri sýpermarketterden birdeı azyq-túlik jıyntyǵyn satyp alar bolsańyzdar, onda qunyna qatysty aıyrmashylyq birden baıqaısyzdar. Tipti «A» sanatyndaǵy jelilik dúkenderdiń ózinde bilinedi. Al eger úıdiń janyndaǵy dúkennen saýda jasasańyz, onda árıne sizge tıimsiz bolady. Adam ortasha eseppen aptasyna 4 ret saýda jasaıdy. Eki ret azyq-túlikti molynan jáne 2 ret úıdiń janyndaǵy dúkennen alady», - dedi Saýda mınıstr.

Onyń atap ótýinshe, 2019-2020 jyldary elimizdi 550 myń tonna, al 2017 jyly 490 myń tonna kúrish óndirilgen.

«Bıylǵa 507 myń tonna kúrish josparlanǵan. Óte az kólemde ımporttap otyrmyz. Osy jyldyń 10 aıynda 76 tonna kúrish eksporttadyq. Búginde shamamen 250 myń tonna qor bar. Kúrishke qatysty eshqandaı qater joq. Degenmen, qalaı degende de jeltoqsan aıynda monıtorıng jasaýǵa sheshim qabyldadyq», - dedi Serik Jumanǵarın.

Aıta keteıik, búgin Úkimet otyrysynda QR Premer-Mınıstri Álıhan Smaıylov keıbir aqparat quraldaryndaǵy kúrishke qatysty málimetterge alańdaýshylyq tanytqan edi.