Premer-Mınıstrdiń qatysýymen Astana vokzalynan «Densaýlyq» poıyzy saparǵa attandy
STANA. Shildeniń 1-i. QazAqparat /Gúlmıra Álıakparova/ - Búgin Astananyń temirjol vokzalynan QR Premer-Mınıstri Kárim Másimovtyń qatysýymen «Densaýlyq» emdeý-dıagnostıkalyq medıtsınalyq poıyzyn saltanatty túrde saparǵa shyǵaryp salý sharasy ótti.
«Densaýlyq» poıyzy shalǵaıda ornalasqan stansylar men razezderde turatyn adamdarǵa qol jetimdi bilikti medıtsınalyq kómek kórsetý úshin shyǵaryldy. Mundaı poıyzdyń jasaqtalýyna «Qazaqstan temir joly» UK» AQ, QR Tótenshe jaǵdaılar mınıstrligi men Densaýlyq saqtaý mınıstrligi muryndyq boldy.
K.Másimov atap kórsetkendeı, Elbasynyń tapsyrmasyna sáıkes Úkimet, quzyrly mınıstrlik pen «QTJ» Ulttyq kompanııasy densaýlyq máseleleri boıynsha birneshe naqty isterdi qolǵa alyp, júzege asyrdy.
«Azamattarymyzdyń densaýlyǵy - Memleket basshysynyń bizge aıqyndap bergen basymdyǵy. Biz búgin myna tamasha poıyzdy saparǵa attandyratyn bolamyz. Árbir adam ózine degen qamqorlyq pen iltıpatty seziný úshin poıyz medıtsınalyq kómekterdi elimizdiń túkpir-túkpirinde ornalasqan temirjolshylarǵa ǵana emes, barsha azamattarymyzǵa kórsetetin bolady», - dedi ol.
Úkimet basshysynyń sózine qaraǵanda, aldaǵy ýaqytta osyndaı taǵy eki poıyz jasaqtalatyn bolady.
Qaraǵandy, Pavlodar, Zaşıta, Óskemen, Aqmola, Qostanaı, Pavlodar baǵyttaryna bet alǵan medıtsınalyq poıyz barlyǵy 57 stansyǵa, ár qaısyna eki kúnnen toqtap, Astanaǵa 120 kúnniń ishinde oralatyn bolady. Oblystar men iri ortalyqtarda medıtsınalyq personal aýysyp otyrady.
Tegin medıtsınalyq qyzmetpen 45 myńǵa jýyq adamdy qamtý qarastyrylyp otyr. Olarǵa birinshi jáne joǵary dárejeli biliktilikteri bar - terapevt, pedıatr, nevropatolog, okýlıst, LOR, gınekolog, hırýrg pen ýrolog qyzmet etetin bolady. Eń bastysy, poıyz, zamanaýı zerthanalyq-ınstrýmentaldy zertteý apparattarymen jaraqtandyrylǵan. Olardyń ishinde qan men zárdi bıohımııalyq saraptaý, rentgen jáne flıýrografııa, ishki aǵzalardy ýltradybyspen zertteý, sondaı-aq júrek, asqazan jáne basqa da organdardy tekserý quraldary bar. Sondaı-aq vagondarda apparattardyń temperatýrasyn bir qalypta ustap turý úshin arnaıy aýa baptaǵyshtar men sýdy zararsyzdandyrý quraldary ornalastyryldy.
Poıyz tirkemesinde barlyǵy 9 vagon, olardyń 4-ýinde - emdeý jáne dıagnostıka jasalady, 2-ýi - medıtsınalyq personaldyń jatyn orny, 1-ýinde medpreparttar saqtalǵan bolsa, qalǵan ekeýiniń bireýi - ashana men avtonomdy energııamen qamtamasyz etetin vagondar.
