Premer-Mınıstrdiń birinshi orynbasary Baıqońyr qalasynda boldy
Bul týraly Qyzylorda oblysy ákiminiń baspasóz qyzmetinen habarlady.
Úkimeti basshysynyń birinshi orynbasary bastaǵan delegatsııa munda taıaýda ǵana «Proton-M» zymyran tasyǵyshy qulaǵan oryndy kórdi. Odan keıin «Gagarın starty» ortalyǵynda, «Baıqońyr» ǵarysh aılaǵynyń murajaı kesheni jáne Tóretam kentindegi emhanalarda boldy. Osynda zymyran tasyǵyshynyń qulaǵan ornyn qalpyna keltirip, zalalsyzdandyrý jumystaryn baqylaý komıssııasynyń kóshpeli májilisi ótkizildi.
Májiliste Qyzylorda oblysynyń ákimi Qyrymbek Kósherbaev «Baıqońyr» ǵarysh aılaǵynda bolǵan apat oblys turǵyndarynyń densaýlyǵyna áserin tıgizip jatqanyn atap ótti. Osyǵan oraı aımaq basshysy naqty sharalardy qolǵa alýdy usyndy. Ekologııalyq jaǵdaıǵa baılanysty udaıy monıtorıng jasap jáne aımaqtaǵy halyq densaýlyǵyn baqylap otyrý qajettigin, sondaı-aq ǵaryshtyq ınfraqurylym nysandaryn qoldanýda birlesip baqylaý kerektigin atap ótti. «Turǵyndardyń áleýmettik hal-jaǵdaıyn kóterý úshin Baıqońyr qalasyn, Tóretam kentin jáne Aqaı aýylyn damytý joldaryn qarastyrý kerek»,-dedi Q. Kósherbaev.