Premer-Mınıstr jem-shóp problemasynyń bıyl qaıtalanbaýyn tapsyrdy

NUR-SULTAN. QazAqparat – Byltyrǵydaı jem-shóp tapshylyǵy bolmaý úshin «Azyq-túlik kelisimshart korporatsııasy» forvardtyq satyp alý aıasynda sharýashylyqtardy jemshóp daıyndaýǵa yntaladyrýy kerek. QR Premer-Mınıstri Álıhan Smaıylov Úkimet otyrysynda osyndaı tapsyrma berdi, dep habarlaıdy QazAqparat tilshisi.

Úkimet basshysy bul baǵytta memlekettik organdarǵa birneshe naqty tapsyrma júktedi.

«Birinshi, Aýyl sharýashylyǵy mınıstrligi ákimdiktermen birlesip, áleýmettik mańyzy bar daqyldar men jem-shópti jetkilikti kólemde egýdi qamtamasyz etsin. Ótken jyly elimizdiń keıbir aımaqtarynda jem-shóppen qamtamasyz etý boıynsha problemalar bolǵanyn bilemiz. Bıyl bul jaǵdaı qaıtalanbaýy tıis. Sondyqtan «Azyq-túlik kelisimshart korporatsııasy» óziniń forvardtyq satyp alýy aıasynda sharýashylyqtardy osy jumysqa yntalandyrýy kerek», - dedi Álıhan Smaıylov.

Sondaı-aq ol sharýalardy sýmen qamtý sharalaryna da toqtaldy.

«Ekinshi, Ekologııa mınıstrligi Aýyl sharýashylyǵy mınıstrligimen jáne ákimdermen birge jaz aılarynda sharýalardy sýmen qamtamasyz etý sharalaryn qabyldasyn.

Úshinshi. Indýstrııa mınıstrligi ákimdermen birlesip, birinshi kezekte, ishki naryqty qamtamasyz etý úshin mıneraldyq tyńaıtqyshtardy óndirýshilermen jumys júrgizsin», - dedi Premer-Mınıstr.