Premer-Mınıstr JEK-tiń óńirlik aımaqtaryn qurý máselesin pysyqtaýdy tapsyrdy

NUR-SULTAN. QazAqparat – Búgin Úkimet otyrysynda Prmer-Mınıstr Asqar Mamın jańartylatyn energııa kózderin (JEK) damytýǵa qatysty birqatar tapsyrma júktedi, dep habarlaıdy QazAqparat tilshisi.

«Ózderińizge málim, jańartylatyn energııa kózderiniń eń keń taralǵany – kún men jel energııasyn óndirý aýa raıynyń ózgerýine baılanysty. Bul óndirý qýatynyń turaqsyz bolýyna ákeledi jáne Qazaqstannyń biryńǵaı energııa júıesiniń ornyqtylyǵyna áser etedi. Osyǵan oraı, Energetıka mınıstrligine Ekologııa mınıstrligimen jáne «KEGOC» aktsıonerlik qoǵamymen birlesip, elektr energııasynyń turaqty óndirisin damytý boıynsha usynystar engizýdi jáne jańartylatyn energııa kózderin jınaqtaý qoımalaryn engizý máselesin pysyqtaýdy tapsyramyn», - dedi Úkimet basshysy.

Onyń aıtýynsha, qazirgi kezde jańartylatyn energııa kózderi obektileriniń shaǵyn toraptyq aımaqtaryn jasaý úlgileri bar, munda bir aımaqta birneshe obekti iske asyrylady. Osyǵan baılanysty Energetıka mınıstrligine ákimdiktermen birlesip, jańartylatyn energııa kózderiniń óńirlik aımaqtaryn qurý máselesin pysyqtaý tapsyryldy.

«Gaz elektr stantsııalaryn iske qosý jańartylatyn energııa kózderiniń qosymsha kólemin ıntegratsııalaý boıynsha energııa júıesi múmkindikterin ulǵaıtýǵa múmkindik beredi. Sondyqtan Energetıka mınıstrligine «KEGOC» aktsıonerlik qoǵamymen birlesip, 2022 jyldan bastap naqty ýaqyt rejıminde teńgerimdi naryqty iske asyrý jumysyn júrgizýdi tapsyramyn. Osy sharalardy iske asyrýdyń nátıjesinde jańartylatyn energııa kózderiniń turaqty naryǵyn damytýǵa qajet jaǵdaı jasalynady jáne oǵan negiz bolady», - dedi Asqar Mamın.