Premer-Mınıstr veterınarııa mamandyǵyna bilim granttaryn kóbeıtýdi tapsyrdy
«Memleket basshysy atap ótkendeı, eldiń azyq-túlik qaýipsizdigi men otandyq mal sharýashylyǵy jáne ósimdik sharýashylyǵy ónimderiniń eksporttyq áleýeti - veterınarııalyq jáne fıtosanıtarııalyq qyzmetterdiń sapaly jumysyna baılanysty. Osyǵan oraı Aýyl sharýashylyǵy mınıstrliginiń aldynda veterınarııalyq jáne fıtosanıtarııalyq qyzmetti kúsheıtý jónindegi sharalar keshenin ázirleý mindeti tur. Jalpy usynǵan sharalardy qoldaýǵa bolady dep esepteımin», - dedi QR Premer-Mınıstri Úkimet otyrysynda.
Osy baǵytta A. Mamın tekserý, baqylaý jáne monıtorıng júrgizý boıynsha is-sharalardy uıymdastyrý jónindegi jumysty kúsheıtýdi tapsyrdy.
«Bul sharalardy der kezinde júrgizý - jaǵdaıdy baqylaýǵa múmkindik beredi jáne mal men ósimdik sharýashylyǵynyń odan ári damýynyń negizin jasaıdy. Aýyl sharýashylyǵy jáne ádilet mınıstrlikteri múddeli memlekettik organdarmen birlesip, jergilikti atqarýshy organdardyń karantındi ári shekteý is-sharalaryn belgileý jáne alyp tastaý jónindegi sheshimderin ádilet organdarynda tirkeý rásimin jeńildetsin», - dedi Premer-Mınıstr.
Úkimet basshysynyń paıymynsha, Aýyl sharýashylyǵy mınıstrligi múddeli memlekettik organdarmen birlesip, tıimdi baqylaýdy uıymdastyrý úshin veterınarııalyq jáne fıtosanıtarııalyq qadaǵalaý ulttyq júıesin damytý qajet.
«Tıisti aqparattyq bazany jetildirý jáne ony jańartý protsesterin avtomattandyrý arqyly aýyl sharýashylyǵy janýarlaryn 100 paıyz sáıkestendirýdi qamtamasyz etý kerek. Aýyl sharýashylyǵy mınıstrligi Bilim mınıstrligimen birlesip, salaǵa qajetti kadrlardy daıarlaýdy jetildirý jáne túlekterdiń keıinnen aýylda jumys isteý shartymen veterınarııalyq jáne fıtosanıtarııalyq qyzmet mamandyqtaryna bólinetin granttardy kóbeıtý máselesin pysyqtasyn», - dedi Asqar Mamın.
