Premer-Mınıstr Úkimet múshelerine mobıldi planshetterdi paıdalanýdy tapsyrdy
ANA. Qazannyń 28-i. QazAqparat /Rýslan Ǵabbasov/ - Búgin selektorlyq rejimde ótken Úkimet otyrysynda Premer-Mınıstr Kárim Másimov Úkimet múshelerine mobıldi planshetterdi paıdalaný kerektigin aıtty.
«Sońǵy ret eskertemin, Úkimet músheleri baılanys planshetterin ózderimen birge alyp júrýleri tıis»,- dep toqtalǵan Premer-Mınıstr, «maǵan hat-habar jibergenderge 10 mınýttyń ishinde jaýap qaıtaramyn. Al keıbir Úkimet múshelerinen jaýap almaǵaly úshinshi kún boldy. Osy oraıda sońǵy ret eskertemin, tapsyrma oryndalýy tıis»,-dedi.
Esterińizge sala keteıik, qazannyń 26-sy kúni Astanada 4 G ilki jobasyn tanystyrý kezinde Úkimet basshysy Kárim Másimov Úkimet músheleri endi mobıldi planshetter arqyly baılanysatyndaryn aıtqan bolatyn.
Aıta keteıik, mobıldi planshetter ınternet jelisi arqyly hat-habar túrinde baılanysqa shyǵýǵa, beıne jáne dybys jazbalardy kórip, tyńdaýǵa, elektrondy kitapshalardy qaraýǵa múmkindik beretin shaǵyn kompıýterler sanatyna jatady.
Budan buryn habarlanǵandaı, qyrkúıektiń 21-i kúni Úkimettiń Baılanys jáne aqparat mınıstrliginde ótken kóshpeli otyrysynda Premer-Mınıstr mınıstrlikterdiń jáne agenttikterdiń basshylaryn Úkimet basshysynyń tapsyrmasyn shuǵyl túrde alyp otyrýǵa múmkindik beretin elektrondyq jańashyldyqtardy paıdalanýǵa shaqyrǵan bolatyn. Premer-Mınıstr bul oraıda mınıstrlikter men agenttikterdiń basshylary, sonyń ishinde ózi de, «qupııa emes» elektrondy poshtalaryn BlackBerry-ge (bunyń kómegimen uıaly telefon arqyly elektrondy poshtany paıdalanýǵa bolady) shyǵarý qajet dep esepteıtinin jetkizgen edi. Osy oraıda K. Másimov Baılanys jáne aqparat mınıstrligine Premer-Mınıstrdiń keńsesimen, sondaı-aq «Qazaqtelekom» komanııasymen birlesip bul máseleni pysyqtaýǵa bir apta ýaqyt bergen bolatyn. K. Másimov qaramaǵyndaǵylarǵa tapsyrma júkteý úshin bul qyzmet túrin paıdalanýǵa qulyqty ekenin jáne qaramaǵyndaǵylar da osy qyzmet túri arqyly ózine tikeleı ótinish jasaı alatynyn atap kórsetken.
Onyń pikirinshe, aqparattandyrý úderisin Úkimet músheleri aldymen ózinen bastamasa, is bir ornynan qozǵalmaıdy. «Biz bul máseleni ornynan qozǵaýymyz kerek. Men memleket basshylarynyń, úkimet basshylarynyń avtomobılde otyryp «qupııa emes» poshtalardy paıdalanǵanan kórdim», degen bolatyn Úkimet basshysy tapsyrmany berip turyp.
