Premer-Mınıstr Tarazda tazartý qondyrǵylaryn tezdetip salýdy tapsyrdy

TARAZ. QazAqparat – Premer-Mınıstr Álıhan Smaıylov Jambyl oblysyna jumys sapary aıasynda Taraz qalasynyń sarqyndy sýlardy súzý alańdarynyń jaı-kúıimen jáne jańa káriz-tazartý qurylystaryn (KTQ) salýǵa daıyndyq barysymen tanysyp, jańa oblystyq kópsalaly onkologııa jáne hırýrgııa ortalyǵynda boldy, dep habarlaıdy QazAqparat Úkimettiń baspasóz qyzmetine silteme jasap.

Tarazda sarqyndy sýlardy súzý alańdary 1962 jyly salynǵan jáne búginde ábden tozyǵy jetken. Máseleni sheshý úshin ákimdik jańa káriz-tazartý qurylystaryn iske qosý jobasyn ázirlep bastady. Qazir qajetti tehnıkalyq qujattama daıyndalyp jatyr. Qurylysty 2025 jyly bastaý josparlanyp otyr.

Premer-Mınıstr Tarazda ónerkásip nysandarynyń kóbeıip, halyq sany artyp kele jatqanyn, alaıda qalada áli kúnge sheshimin tappaǵan kommýnaldyq máseleler bar ekenin atap ótti.

«Qalada tazartý qondyrǵylary joq. Bul ózender men jerasty sýlarynyń lastanýyna ákelip soqtyratyn úlken problemaǵa aınalady. Ákimdik josparly qýattylyǵy táýligine 100 myń tekshe metr bolatyn jańa tazartý qondyrǵylary boıynsha tıisti jumystar júrgizip jatyr. Jobany júzege asyrýǵa tezdetip kirisý kerek», - dedi Álıhan Smaıylov.

Sondaı-aq ol «Qazfosfat» JShS polıgony men qaldyqtardyń jınalýyna qatysty túıtkildi máselelerdi sheshý qajettigin aıtty.

200 oryndyq jańa onkologııalyq dıspanserde Premer-Mınıstrge zamanaýı sáýlelik terapııasyna arnalǵan Elekta Versa HD medıtsınalyq apparaty ornatylǵany baıandaldy.

Álıhan Smaıylov óńirde zamanaýı onkologııalyq ortalyqtyń ashylýy óte qajetti ári durys qadam bolǵanyn, bul onkologııalyq aýrýlarǵa erte dıagnostıka júrgizýge jáne olardy ýaqytyly emdeýdi qamtamasyz etýge múmkindik beretinin basa aıtty.

«Óńirde perınataldyq ortalyq pen jańa aýdandyq aýrýhanalarǵa jáne feldsherlik-akýsherlik pýnktterge de qosymsha qajettilik bar. Densaýlyq saqtaý mınıstrligi ákimdikpen birlesip, olardy salý máselesin, onyń ishinde Ulttyq jobany iske asyrý sheńberinde pysyqtaýy tıis», - dedi ol.