Premer-Mınıstr sýarmaly egis alqaptaryna qatysty tapsyrmalar júktedi
NUR-SULTAN. QazAqparat - QR Premer-Mınıstri Asqar Mamınniń Úkimet otyrysynda sýarmaly egis alqaptaryna qatysty birqatar tapsyrma berdi, dep habarlaıdy QazAqparat tilshisi.
«Irrıgatsııalyq ınfraqurylymdy damytý men jańǵyrtý jobalaryn iske asyrý 2020-2021 jyldary qosymsha 500 myńdaı gektar sýarmaly jerdi paıdalanýǵa múmkindik beredi. Buǵan shamamen 274 mlrd teńge kózdelgen. 88 myń jumys orny qurylady, oǵan qurylys jáne jóndeý jumystary kezindegi 11 myń jumys orny jáne 77 myń turaqty jumys orny kiredi», - dedi Úkimet basshysy.
Premer-Mınıstr sýarmaly jerlerdiń ınfraqurylymyn aýqymdy túrde keńeıtý agroónerkásiptik keshendi damytýǵa eleýli serpin beretinin, ol el ekonomıkasynyń qurylymynda mańyzdy sektorǵa aınalýy tıis ekenin atap aıtty.
«Qabyldanatyn sharalar 2024 jylǵa qaraı jemis-kókónis ónimderi boıynsha ımportty júz paıyz almastyrýǵa múmkindik jasaıdy», - dedi Premer-Mınıstr.
Osy oraıda A. Mamın Ekologııa, Aýyl sharýashylyǵy mınıstrlikterine, ákimdikterge jobalardy iske asyrýdy tezdetip bastaýyna, sondaı-aq qarajattyń tıimdi ıgerilýine tıisinshe baqylaý júrgizýdi tapsyrdy.
«Jumys oryndaryn saqtaýǵa jáne jańa jumys oryndaryn qurýǵa erekshe kóńil bólinýi qajet. Aýyl sharýashylyǵy mınıstrligi ákimdiktermen birlesip, paıdalanýǵa beriletin sýarmaly jerlerdi barynsha jumys júrgizsin. Óńirler jer ýchaskelerin ýaqytynda bólý, fermerlik alqaptarǵa qajetti ınfraqurylymdy jetkizý boıynsha barlyq sharalardy qabyldaýy qajet», - dedi Úkimet basshysy.
