Premer-Mınıstr sport nysandary jaıynda: Jóndelgen stadıondar qaıta qırap jatyr
«Buqaralyq sportty damytý boıynsha túrli baǵdarlamalar men jobalarǵa qaramastan, kóptegen júıeli máseleler sheshimin tapqan joq. Máselen, aqparattyq keńistikti monıtorıngteý nátıjesinde shilde aıynyń ózinde ǵana osy saladaǵy problemalarǵa qatysty halyqtan kóp shaǵym túsetini anyqtaldy. Ókinishke qaraı, jergilikti bılik turǵyndar kótergen máselelerdi sheshýge tıisti deńgeıde áreket jasamaı otyr. Máselen, Pavlodar oblysy Baıanaýyl aýdany Maıqaıyń kentinde 2020 jyly jóndelgen stadıon qulap jatyr. 3 jyl ishinde bul obekt jaramsyz bolyp qaldy dese de bolady: fýtbol alańy men júgirý joldarynan bastap trıbýnalar men kıim aýystyratyn bólmelerge deıin jaramsyz kúıge túsken», - dedi Á. Smaıylov.
Sonymen qatar Úkimet basshysy Qaraǵandy oblysyndaǵy Shubarkól kómir vahtalyq kentinde sport zaly qırap qalǵanyn synǵa aldy. Bul jaǵdaı osy nysanǵa eshkim kóńil bólmegenin kórsetip otyr.
«Aqtóbe oblysynyń Shıqudyq aýylyndaǵy Terekti mektebinde sportzal joq. Aıtpaqshy, sportzaldary joq mektepter tek shaǵyn aýyldarda ǵana emes, sonymen qatar iri qalalarda da kóp. Dene shynyqtyrý muǵalimderi men kásibı jattyqtyrýshylar jetispeıdi. Sonymen qatar, jurtshylyq Astanadaǵy Ulttyq sport ýnıversıtetiniń jáne Almaty oblysyndaǵy Olımpıadalyq daıarlyq ortalyǵynyń qurylysy uzaqqa sozylyp ketkenine narazy. Sportty damytý jáne salamatty ómir saltyn nasıhattaý baǵytynda biz aýqymdy jumystar jasap kelemiz. Alaıda, keıbir máseleler boıynsha bir orynda turyp qaldyq. Ókinishke qaraı, bizde dene shynyqtyrý men sportty basqarýdyń tıimdi birtutas júıesi joq. Bul másele, ásirese, jergilikti jerlerde óte ózekti», - dedi Premer-Mınıstr.
