Premer-Mınıstr Shymkenttegi «Ońtústik» ındýstrıaldy aımaǵyn aralady
ShYMKENT. QazAqparat - QR Premer-Mınıstri Baqytjan Saǵyntaev Shymkenttegi «Ońtústik» ındýstrıaldy aımaǵynda bolyp, ondaǵy iri kásiporyndardyń jumysymen tanysty, dep habarlaıdy QazAqparat tilshisi.
Turǵyn úı qurylysyna baılanysty atqarylǵan sharýalarǵa qanyqqan Úkimet basshysy «Shymkent Temir» JShS-ǵa aıaldady. Keleshekte bolat shyǵaratyn kásiporynnyń qurylysy 2017 jyly bastalǵan. Ol aǵymdaǵy jyldyń sáýir aıynda iske qosylady. Jobaǵa tartylǵan ınvestıtsııa kólemi - 4,85 mlrd teńge. Jylyna 240 myń tonna ónim shyǵarýǵa qaýqarly kásiporyn 150 adamdy jumyspen qamtymaq. Jospar boıynsha daıyn ónim Ortalyq Azııa elderine eksporttalatyn bolady.
Joba QR Indýstrıaldy-ınovatsııalyq damý baǵdarlamasy aıasynda iske asyrylýda. Zaýytqa taýar tasymaldaýǵa arnalǵan temirjol relsteri tartylǵan. Odan bólek, qýaty 63 MVt-tyq elektr stansysy salyndy.
Aıta keteıik, jalpy ońtústikte 2015-2019 jyldarǵa arnalǵan Indýstrıaldy-ınovatsııalyq damý baǵdarlamasy aıasynda quny 1,3 trln teńgeni quraıtyn 137 joba júzege asyrylatyn bolady. Nátıjesinde 18 myńnan astam jańa jumys orny ashylady dep kútilýde.
Eske salaıyq, búgin Baqytjan Saǵyntaev Memleket basshysynyń tapsyrmasy boıynsha Ońtústik Qazaqstan oblysyna keldi. Saryaǵash aýdanynda birqatar nysandardy aralap, aýylsharýashylyq mamandarymen kezdesti. Keıin Shymkentte salynyp jatqan «Shymkent Sity» qalashyǵynyń qurylys barysymen tanysty.
