Premer-Mınıstr reseılik iri kompanııalardyń basshylarymen kezdesti
«KAMAZ» JAQ bas dırektory Sergeı Kogogınmen kezdesý barysynda jańa jobalardy iske asyrý, jabdyqtardy jetkizý jáne kommertsııalyq tehnıkaǵa qyzmet kórsetý ortalyqtaryn iske qosý máseleleri talqylandy.
Sergeı Kogogın Úkimet basshysyna kompanııanyń qazirgi qyzmeti, birlesken jobalardy iske asyrý týraly habarlap, «KAMAZ» JAQ-tyń buryn alǵan barlyq mindettemelerdi oryndaýǵa daıyn ekendigine sendirdi.
QR Premer-Mınıstri «KAMAZ» kompanııasymen birlesken jobalardyń Qazaqstan-Reseı óndiristik kooperatsııasy salasyndaǵy ózara is-qımyl baǵdarlamasy aıasynda iske asyrylyp jatqan alǵashqy jobalardyń biri ekenin atap ótti.
«Búginde Qostanaı ındýstrııalyq aımaǵynyń alańynda shoıyn qorytý zaýytynyń jáne júk kólikteriniń qosalqy bólshekterin shyǵaratyn zaýyttyń qurylysy júrip jatyr. Bul ekologııa salasyndaǵy úzdik tájirıbeler men standarttardy eskere otyryp jasalǵan joǵary tehnologııalyq zamanaýı óndiris bolmaq», — dedi Álıhan Smaıylov.
Budan basqa, kompanııa júk tehnıkasy ótetin jetekshi kópirlerdiń tirekterin lokalızatsııalaý deńgeıin arttyrý boıynsha taǵy bir iri jobany ázirlep jatyr.
«Bul jobalardyń ekonomıkalyq jáne áleýmettik áseri mol. Birlesken kúsh-jigerdiń arqasynda olardyń tabysty ári ýaqytyly iske asyrylatynyna senimdimin», — dedi QR Premer-Mınıstri.
Álıhan Smaıylov Qazaqstanda qolaıly bıznes júrgizý úshin barlyq qajetti jaǵdaılar jasalǵanyn atap ótti. Arnaıy ekonomıkalyq jáne ındýstrııalyq aımaqtar tıimdi jumys istep, damý ınstıtýttary jeńildikpen nesıe beredi jáne lızıngtik qarjylandyrýdy júzege asyrady, sondaı-aq ınvestorlar úshin memlekettik qoldaý sharalary men preferentsııalar zańnamalyq túrde bekitilgen.
«Rýsskaıa mednaıa kompanııa» prezıdenti Vsevolod Levınmen bolǵan kezdesýde taý-ken metallýrgııa salasynda jańa jobalardy iske asyrý máseleleri talqylandy.
Máselen, «Aqtóbe mys kompanııasy» 2024 jylǵa deıin shamamen 190 mlrd teńgege jerasty kenishterin salý boıynsha 4 jobany iske asyrýdy josparlap otyr.
V. Levın RMK-nyń Aqtóbe oblysyndaǵy óndiristik qyzmeti, sondaı-aq Jetisý oblysyndaǵy «Kóksaı» jáne Abaı oblysyndaǵy «Aıdarly» ken oryndarynda jobalardy iske asyrý josparlary týraly aıtyp berdi.
Úkimet basshysy «Kóksaı» jáne «Aıdarly» ken oryndaryn ıgerýdiń elimiz úshin úlken mańyzǵa ıe ekenin atap ótti. Ol Qazaqstannyń tek óndirýge ǵana emes, sondaı-aq shıkizatty odan ári qaıta óńdeýge jáne qosylǵan quny joǵary ónim óndirýge de múddeli ekenin atap ótti.
«Úkimet jer qoınaýyn paıdalanýshy iri kásiporyndardyń aınalasynda óńdeý ónerkásibinde shaǵyn jáne orta bıznesti damytý boıynsha jumys júrgizip jatyr. «Rossııskaıa mednaıa kompanııa» bul bastamany qoldap, osy baǵytta belsendi túrde jumys isteıdi dep senemin», — dep túıindedi Álıhan Smaıylov.
Foto: primeminister.kz
