Premer-Mınıstr: Pedagogıka mamandyǵyna túsý úshin «talas» bolý kerek

TALDYQORǴAN. QazAqparat - Pedagogıka mamandyǵyna túsý úshin «talas» bolý kerek. QR Premer-Mınıstri Baqytjan Saǵyntaev Taldyqorǵanda ustazdar qaýymymen kezdesý barysynda osylaı dedi, dep habarlaıdy QazAqparat tilshisi.

«Biz muǵalimniń statýsyn kóteretin bolsaq, onyń aılyǵyn kóteretin bolsaq, onda búgingi kúni osy mamandyqqa túsý úshin  «talas» bolý kerek. Pedogogıkalyq ınstıtýtqa barǵanda qanshama konkýrs bolý kerek. Óıtkeni, onyń ómirdegi orny bólek. Sebebi, onyń áleýmettik statýsy ózgeredi. Onyń mártebesi zańmen qorǵalǵan. Óıtkeni ondaı muǵalim mártebesi basqalarda joq. Biz sol kezde ǵana joǵary bilimdi pedagogqa jáne sapaly bilimge qol jetkizemiz»,  - dedi Premer-Mınıstr.

Premer-Mınıstr osylaısha pedagogıka salasyn tańdaǵan stýdentterge talapty kúsheıtý kerektigin aıtty. Endi bolashaqta  ustazdyq mamandyq kez-kelgen talapker úshin burynǵydaı  qoljetimdi bolmaýy múmkin.

«Áıteýir oqýǵa túsý kerek bolsa, pedagogıkalyq mamandyqqa túse salsyn deıdi. Áıteýir bilimi joq degennen góri... Sol bala tústi,  bilimin alyp shyqty. Endi qaıda baryp jumys isteıdi? Aýylǵa jiberemiz. Stependııasyn aldy, úı berdi, úılendi. Sóıtip qaldy sol jerde. Biraq asyp bara jatqan bilimi joq, ol mekteptegi balany oqytady. Ol ne bilim beredi oǵan?!», - B. Saǵyntaev.

Premer-Mınıstr Taldyqorǵanda alǵash ret ashylǵan  №28 ІT lıtseıde bilim salasyndaǵy reformalardy tizbektep berdi. Muǵalim mártebesin kóterýde ustazdardyń da bilimdi de bilikti, izdenimpaz ári shyǵarmashyl bolýy qajettigin tilge tıek etti.