Premer-Mınıstr Óskemendegi №46 mektepte boldy
ÓSKEMEN. QazAqparat - Shyǵys Qazaqstan oblysynda jumys saparymen júrgen Úkimet basshysy Baqytjan Saǵyntaev Óskemendegi №46 mektepte bolyp, bilim berý salasyndaǵy ilki jobalarmen tanysty, dep habarlaıdy QazAqparat tilshisi.
Premer Mınıstrge atalmysh mektep bazasynda «Meniń mektebim» aktsııasynyń nátıjeleri tanystyryldy. Óńirdegi iri kásiporyndar men kásipkerler «Paryz» qoryna aýdarǵan 2,8 mlrd teńgege 277 mekteptiń fızıka, hımııa, bıologııa jáne IT-tehnologııa pánderiniń kabınetteri Nazarbaev Zııatkerlik mektebiniń standartyna saı jabdyqtalǵan. Budan bólek, atalmysh qarjy esebinen 600 muǵalim kásibı biliktiligin arttyrýǵa múmkindik aldy.
Óńirdegi bilim berý salasyna tyń serpin bergen aktsııa 2021 jylǵa deıin jalǵaspaq. Ekinshi kezeńde demeýshilerdiń qarjysyna 492 mektepti 1068 aktıv panelmen qamtý kózdelgen.
«Sensorly ekranmen jabdyqtalǵan bul panelder oqýshynyń aqparatty tez meńgerýine taptyrmaıtyn qural. Buryn qandaı da bir tájirıbeni is júzinde jasaý qajet bolsa, qazir aktıv paneldiń kómegimen sonyń bárin ekranda kórsetýge bolady. Muǵalim taqtaǵa bormen keste syzyp, qalammen jazyp áýre bolmaıdy», - deıdi mektep dırektory Gúlfarıda Aýǵanbaeva.
Zamanǵa saı jabdyqtalǵan pán kabınetterin aralaǵan Baqytjan Saǵyntaev jasalyp jatqan jumystarǵa oń baǵasyn berdi.
«Oblys ákiminiń aıtýynsha, elimiz boıynsha ashylǵan IT-synyptardyń 90 paıyzy Shyǵysta eken. Sensorly panelde kez kelgen zerthanalyq jumysty elektrondy túrde jasaıtyndaı jaǵdaı bar. Bul ári qolaıly, ári tıimdi» - dedi Premer-Mınıstr.
Úkimet basshysynyń nazaryna bilim berý salasynda júzege asyp jatqan óńirlik baǵdarlamalar da usynyldy. Túlekterdiń ózge memleketke aǵylýyn toqtatý úshin jyl saıyn oblys bıýdjetinen oqý granttary bólinýde. Bıyl ondaı granttar sany 446-ǵa jetip otyr. Osy qadamdardyń arqasynda syrtqa ketken túlekterdiń sany eki jylda 1800-den 636-ǵa azaıǵan.
Oblys ákiminiń orynbasary Ásem Núsipovanyń aıtýynsha, qarasha aıynda Shyǵysta úsh aýysymdyq mektepter men apattyq jaǵdaıdaǵy bilim oshaqtarynyń máselesi tolyq sheshilmek.
«2017 jyly oblys boıynsha 5 mektep berilse, 2018-2019 jyldary 10 mlrd teńgege 6 mektep salynýy tıis. Osynyń arqasynda qarasha aıynyń ózinde 3 aýysymdyq jáne apattyq jaǵdaıdaǵy mektepter máselesi kún tártibinen túsedi» -dedi Ásem Núsipova.
Onyń aıtýynsha, bıyl mektep túlekteriniń 40 paıyzy sanaly túrde kásibı-tehnıkalyq kolledjderdi tańdaǵan.
«Bul oblystaǵy kásibı-tehnıkalyq kolledjderdiń bilim sapasy joǵary ekenin aıǵaqtaıtyn kórsetkish. Jumysqa ornalasý múmkindigi joǵary bolǵandyqtan, túlekter kolledjderdi tańdaýda. Ózge oblystarǵa da taratýǵa bolatyn tájirıbe» - dedi Úkimet basshysy.
