Premer-Mınıstr Ortalyq Azııa elderi úkimeti basshylarymen yntymaqtastyqty damytý jaıyn talqylady
Ózbekstan Premer-Mınıstri Abdýlla Arıpovpen kezdesý barysynda ónerkásip kooperatsııasy, aýyl sharýashylyǵy men tranzıttik-kólik sektoryndaǵy yntymaqtastyq, sondaı-aq sý resýrstary salasyndaǵy ózara is-qımyl máseleleri talqylandy.
2021 jyldyń qorytyndysy boıynsha elder arasyndaǵy ózara saýda-sattyq kóleminiń 33%-ǵa artyp, $4,3 mlrd-qa jetkeni, al bıylǵy 4 aıda taýar aınalymy 24,5%-ǵa ósip, $1,4 mlrd quraǵany aıtyldy.
«Ózara saýda kólemin $10 mlrd-qa jetkizý týraly eki el basshylary qoıǵan mindetti iske asyrý bizden keshendi tásilderdi talap etedi. Ol úshin Qazaqstan men Ózbekstannyń ekonomıkalyq áleýeti jetkilikti. Osyndaı turaqty kezdesýler qazaq-ózbek qatynasyn jańa deńgeıge kóterýge yqpal etedi dep sanaımyn», - dedi Álıhan Smaıylov.
«COVID-ten tys jerde – Ortalyq Azııany ádildik negizinde qalpyna keltirý jolynda» taqyrybyndaǵy Turaqty damý maqsattary boıynsha ekinshi óńirlik sammıtte QR Premer-Mınıstri Álıhan Smaıylov Qyrǵyzstan jáne Tájikstannyń Úkimet basshylarymen de ekijaqty kezdesý ótkizdi.
Qyrǵyzstan mınıstrler kabınetiniń tóraǵasy Aqylbek Japarovpen kezdesý aıasynda saýda jáne ınvestıtsııalar, agrarlyq sektor men sý-energetıka salasyndaǵy ózara is-qımyldy odan ári damytýǵa qatysty ekijaqty yntymaqtastyq máseleleri qaraldy.
«Qyrǵyzstan – óńirdegi negizgi saıası jáne ekonomıkalyq áriptesterdiń biri. Búginde eki el arasyndaǵy ekijaqty baılanystar barlyq salada tabysty damyp keledi», - dedi Álıhan Smaıylov.
Kelissóz barysynda ózara saýdada belgilengen maqsattarǵa qol jetkizý úshin kúsh-jigerdi arttyryp, oń dınamıkany saqtaý jáne taýar aınalymyn ulǵaıtý qajettigi atalyp ótti.
Tájikstannyń Premer-Mınıstri Kohır Rasýlzodamen kezdesý barysynda saýda-ekonomıkalyq yntymaqtastyq, AÓK-te birlesken kásiporyndar qurý, sondaı-aq ónerkásip pen sý salasyndaǵy ózara is-qımyl máseleleri talqylandy.
Álıhan Smaıylov Qazaqstannyń Tájikstanmen yntymaqtastyqty odan ári jan-jaqty damytýǵa erekshe nazar aýdaratynyn atap ótti.
«Eki eldiń Úkimeti qoıylǵan mindetterdi tabysty oryndap keledi. Birlesken sharalardyń arqasynda 2021 jyly eki el arasyndaǵy taýar aınalymy 1,5 ese ósip, 1,1 mlrd dollarǵa jetti. Endi aldymyzda bul kórsetkishti 2 mlrd dollarǵa deıin jetkizý maqsaty tur. Ol úshin bizde qajetti resýrstardyń bar ekenine senimdimin», - dedi QR Premer-Mınıstri.
Eske sala keteıik, Almatyda «COVID-ten tys jerde – Ortalyq Azııany ádildik negizinde qalpyna keltirý jolynda» taqyrybynda Turaqty damý maqsattary boıynsha ekinshi óńirlik sammıti ótip jatyr. Sammıtti QR Úkimeti Eýropalyq odaq pen Azııa damý bankiniń qarjylyq qoldaýymen jáne Qazaqstandaǵy BUU Damý baǵdarlamasymen áriptestikte uıymdastyrdy.
