Premer-Mınıstr óńirlerde mamandandyrylǵan halyqqa qyzmet kórsetý ortalyqtaryn paıdalanýǵa berý merzimin naqytylaýdy tapsyrdy

Úkimet basshysynyń aıtýynsha, Kólik jáne kommýnıkatsııa mınıstrligi usynǵan derekterge sáıkes aǵymdaǵy jyly Aqtaý, Qyzylorda, Taldyqorǵan, Petropavl, Astana qalalarynda mamandandyrylǵan halyqqa qyzmet kórsetý ortalyqtaryn paıdalanýǵa berý josparlanǵan bolsa, al 2014 jyly taǵy 8 ortalyqtyń qurylysy tolyǵymen aıaqtalýǵa tıis bolatyn. Al, Іshki ister mınıstri Qalmuhanbet Qasymovtyń derekteri boıynsha bıyl tek Aqtaý men Astana qalalarynda ǵana mundaı ortalyqtar paıdalanýǵa beriledi.

«Kólik jáne kommýnıkatsııa, Іshki ister mınıstrlerine árbir oblys ortalyqtary boıynsha mán-jaıdy anyqtaýdy tapsyramyn. 1 aptanyń ishinde 2013-2014 jyldary bizde qandaı mamandandyrylǵan halyqqa qyzmet kórsetý ortalyǵy salynatyny týraly usynys engizilsin. 2014 jyl sońǵy merzim. Qarjylandyrý tetigin aıqyndańyzdar. Bul jergilikti, respýblıkalyq bıýdjet nemese teń qarjylandyrý bolýy múmkin. Baqylaýǵa alý Baqytjan Ábdirulyna júkteledi. 1 aptadan keıin naqty aqparat berińizder»,-dedi S. Ahmetov.