Premer-Mınıstr: «Ońaı» ońaı emes eken
ALMATY. QazAqparat - QR Premer-Mınıstri Baqytjan Saǵyntaev «Alataý» ınnovatsııalyq tehnologııalar parki arnaıy ekonomıkalyq aımaǵyna bardy, dep habarlaıdy QazAqparat tilshisi.
Qazaq-Brıtan tehnıkalyq ýnıversıtetiniń Teńiz akademııasynda Premer-Mınıstrge stýdentterdiń burǵylaý kezindegi qurylǵynyń qalaı jumys jasaıtynyn kórsetetin kompıýterlik jattyqtyrý nusqasy tanystyryldy. Bul nusqa 1,2 mln AQSh dollary turady. 7 kúndik oqý kýrsynyń baǵasy - 300 myń teńge.
Sonymen qatar, Úkimet basshysyna Almaty qalasyndaǵy «aqyldy» beınebaqylaý kameralary men «Ońaı» júıesi tanystyryldy.
«Ońaı ońaı emes eken», - dep qaljyńdady Baqytjan Saǵyntaev «Ońaı» elektrondy bılettendirý júıesimen tanysý barysynda.
«Biz «Ońaıdyń» nátıjelerin kóre bastadyq. Birinshiden, aqsha jınalyp, ashyqtyq paıda boldy. Sonymen qatar, «Ońaı» kartasy barlar Shymbulaqqa da kezeksiz kire alatynyn kórsetip, karta tutyný qyzmetin biriktirip jatyrmyz», - dedi bul qaljyńǵa jaýap bergen Almaty ákimi Baýyrjan Baıbek.
